दम्भ र अहंकारी प्रवृत्तिलाई जनताले सबक सिकाउने छ – संयोजक प्रचण्ड
काठमाडों । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले वामपन्थी तथा देशभक्त शक्तिहरूबीच बृहत् एकता अपरिहार्य भएको बताएका छन् । शुक्रबार धनगढीमा आयोजित सन्देशसभामा देश गम्भीर राजनीतिक मोडमा पुगेको बताउँदै आगामी चुनाव देशको निकासको मुख्य मार्ग भएको बताए । उनले सबैलाई निर्वाचन प्रक्रियामा गम्भीरतापूर्वक जुट्न अपिल गरे । सभालाई सम्बोधन गर्दै प्रचण्डले सुदूरपश्चिम प्रदेशसँग आफ्नो विशेष भावनात्मक र राजनीतिक सम्बन्ध रहेको उल्लेख गरे । गणतन्त्र स्थापनापश्चात सबैभन्दा धेरै संवाद, भ्रमण र विकास पहल सुदूरपश्चिममै गरिएको उनको भनाइ थियो । प्रचण्डले भने सुदूरपश्चिममा जनयुद्ध र जनआन्दोलनमा अपार बलिदान भएको छ । त्यही बलिदानको कदर गर्दै हामीले पछिल्ला वर्षहरूमा यो क्षेत्रलाई निरन्तर प्राथमिकतामा राख्यौँ । प्रचण्डले हालै गठन भएको नेपाली कम्युनिस्ट पार्टी १५ वटा कम्युनिस्ट घटकहरूको ऐतिहासिक एकताको परिणाम भएको उल्लेख गर्दै यसले देशभर नयाँ ऊर्जा पैदा गरेको उल्लेख गरे । अब कोही माओवादी, कोही समाजवादी, कोही केन्द्रीय भन्नुपर्ने आवश्यकता छैन ।
सबै नेपाली कम्युनिस्ट । यही भावनाअनुसार पार्टीको नाम राखिएको हो । देशव्यापी चर्चामा रहेको जेनजी आन्दोलनबारे बोल्दै प्रचण्डले भदौ २३ र २४ गतेका घटनालाई ‘नरसंहार’का रूपमा चित्रित गरे । युवापुस्ताका मागहरू जायज रहेको पुनः दोहोर्याउँदै उनले सरकारको बल प्रयोग गलत भएको उनको भनाइ थियो । देश केही महिनाअघिको राजनीतिक संकटका कारण अत्यन्त गम्भीर मोडमा पुगेको बताउँदै भदौ २६ गते राति ‘गणतन्त्र खारेज हुनसक्ने’ सम्मको चर्चा चलेको स्मरण गरे । त्यो रात राष्ट्रपति कार्यालयबाट आकस्मिक बोलावट आएपछि आफू र माधवकुमार नेपालले शीतल निवास पुगेर संविधान र प्रणालीलाई जोगाउन सक्रिय भूमिका खेलेको उल्लेख गरे । आगामी निर्वाचन नै देशलाई स्थिरता दिने मार्ग भएको स्पष्ट गर्दै प्रचण्डले विगतमा संसद् विघटनमा संलग्नहरूले अहिले पुनर्स्थापनाका कुरा उठाउनु बेमौसमको बतास जस्तै भएको टिप्पणी गरे । एमाले अध्यक्ष केपी शर्मा ओलीतर्फ इंगित गर्दै उनले भने, “देशलाई उल्टो बाटोमा लैजाने दम्भ र अहंकारी प्रवृत्तिलाई जनता आफैँले सबक सिकाउने बेला आएको छ ।