शोभित बस्नेत निर्देशित फिल्म ‘पीआर’ अष्ट्रेलिया, न्यूजिल्याण्ड, जापानमा प्रदर्शन हुने

काठमाडौं । शोभित बस्नेत निर्देशित फिल्म ‘पीआर’ पूर्वी एसियाली मुलुकहरूमा प्रदर्शन हुने निश्चित भएको छ । नेपालमा भने यो फिल्म २६ मंसिरदेखि रिलिज हुनेछ । नेपालसँगै यो फिल्म जापानमा प्रदर्शनमा आउनेछ । स्वदेशमा रिलिज भएको एक सातापछि अस्ट्रेलिया र न्यूजिल्याण्डमा रिलिज हुने प्रेषित विवरणमा उल्लेख छ । विजेन्द्र श्रेष्ठको वितरण कम्पनी श्रेष्ठ फ्यास्लिटी म्यानेज्मेन्ट कम्पनीले अस्ट्रेलिया, न्यूजिल्याण्डको वितरण अधिकार किनेको हो । सामाजिक सन्देश दिने र सबैले बुझ्नुपर्ने विषय भएकाले दर्शकको मागअनुसार आफूले यी दुई मुलुकको वितरण अधिकार किनेको श्रेष्ठले बताएका छन् । यसअघि यो फिल्मलाई अष्ट्रेलियाकै विभिन्न स्थानमा विशेष शो गरिएको थियो ।

फिल्मले नेपालबाट पैसा कमाउने र सुखी जीवन बाँध्ने सपना साँचेर अस्ट्रेलियामा आएर संघर्ष गर्ने विद्यार्थीको कथावस्तु पेश गर्छ । स्थायी आवासीय पत्र (पीआर) पाउन नेपाली विद्यार्थीले गर्नुपर्ने संघर्षको कथावस्तुमा फिल्म बनेको छ । सन् २०२२ को जुनमा परराष्ट्र मन्त्रालयले सार्वजनिक गरेको एक तथ्यांकअनुसार अस्ट्रेलियाको पीआर लिने नेपालीको संख्या १ लाख ५१ हजार १४० पुगेको थियो । पछिल्लो ३ वर्षमा यो संख्यामा बढोत्तरी भएको अनुमान गरिएको छ । यही कथा वरपर घुम्ने फिल्ममा आरए सुरज पौडेल, विनिता कार्की, राजन कुँवर, पूजा चौधरी, आश्मा अधिकारी मस्तानी, विमला खत्री, गणेश बुढाथोकी, म्याक्स कृष्ण थापा र नवीन घायल प्रमुख भूमिकामा छन् । यो फिल्मको प्रवर्धनको लागि निर्देशक बस्नेत अहिले अस्ट्रेलियामा छन् ।