एनएमबी बैंकद्वारा १६ क्रिकेट खेलाडीलाई पुरस्कार घोषणा
काठमाडौं । एनएमबी बैंकले १६ क्रिकेट खेलाडीलाई जनही २१ हजार रुपैयाँका दरले पुरस्कारको घोषणा गरेको छ । विश्व क्रिकेट लिग २ मा उत्कृष्ट प्रदर्शन गरेबापत सहभागी टिमका १६ खेलाडीलाई सम्मान र हौसला स्वरुप नगद प्रदान लागिएको हो । एनएमबी बैंकका प्रमुख कार्यकारी अधिकृत सुनील के सीले खेलाडीहरु राष्ट्रका गौरव भएकाले उनीहरूको मनोबल उच्च कायम राख्न सम्मान र हौसलाका लागि पुरस्कार प्रदान गर्न लागिएको बताए । २०१९ देखि सुरु भएको विश्व क्रिकेट लिग २ का ३५ खेलमा १८ वटामा नेपालले जित हात पार्दै शीर्ष ४ मा प्रवेश गरेको छ ।
नेपालले सुरूवाती चरणका खेलहरूमा कमजोर प्रदर्शन गरे पनि पछिल्ला ११ खेल खेल्दा १० मा जित निकालेको छ ।बिहीबारको खेलमा जित हात पारे नेपाल सिधै ग्लोबल क्वालिफायरमा छनोट हुनेछ । जसमा नेपालले पहिलो पटक विभिन्न टेस्ट राष्ट्रहरुसँग एक दिवसीय खेल्ने मौका पाउनेछ । यो नगद पुरस्कारले भोलिको खेलमा अझै उत्कृष्ट प्रदर्शन गर्न प्रोत्साहित गर्ने विश्वास बैंकले लिएको छ । पुरस्कार रकम सबै १६ खेलाडीको नाममा बैंकमा खाता खोलेर हस्तान्तरण गरिने बैंकका प्रमुख कार्यकारी अधिकृत केसीले जानकारी दिए ।