त्रिचन्द्रमा चैत ९ गते स्ववियु निर्वाचन हुने
काठमाडौं । त्रिचन्द्र क्याम्पसमा चैत ९ गते स्वतन्त्र विद्यार्थी (स्ववियु) निर्वाचन हुने भएको छ । घण्टाघरस्थित सो क्याम्पसमा स्वतन्त्र विद्यार्थी युनियन निर्वाचन समितिले पुनः निर्वाचन कार्यतालिका सार्वजनिक गर्दै ९ गते मतदान मिति तय गरेको हो ।
विद्यार्थी भर्नालाई लिएर विवादका कारण त्रिचन्द्रमा निर्वाचन तालिका प्रभावित बनेको थियो । निर्वाचन अधिकृत राजेन्द्र गौतमले जारी गरेको सूचनामा मतदाता नामावली चैत ३ गते प्रकाशन गर्ने उल्लेख छ । दावी विरोधका लागि चैत ४ गतेको समय तोकिएको छ ।
यस्तै, चैत ५ गते उम्मेदवारी दर्ता र ६ गते उम्मेदवारमाथि दावी विरोधका लागि समय दिइएको छ । यस्तै,७ गते प्रचारप्रसारका लागि समय दिने तय भएको छ । ९ गते बिहान ८ बजेदेखि दिउँसो ४ बजेसम्म मतदानको समय तय गरिएको छ ।