औपचारिक रूपमै गरे वाग्लेले कांग्रेसबाट अलग भएको घोषणा

काठमाडौं । अर्थशास्त्री डा.स्वर्णिम वाग्लेले नेपाली कांग्रेसबाट अलग भएको घोषणा गरेका छन् । बिहीबार दिउँसो साढे ४ बजे सामाजिक सञ्जाल फेसबुकमा लामो स्टाटस लेख्दै उनले औपचारिक रूपमा कांग्रेसबाट अलग भएको घोषणा गरेको हुन् ।
त्यसअघि वाग्लेले कांग्रेसका चार नेता गगन थापा र विश्वप्रकाश शर्मा, डा.शेखर कोइराला र गोविन्दराज पोखरेललाई एसएमएस पठाएर उनले आफू कांग्रेसमा बस्न नसक्ने उल्लेख गरेका थिए ।

राष्ट्रिय स्वतन्त्र पार्टीका सभापति रवि लामिछाने, महामन्त्री मुकुल ढकाललगायतसँगको निरन्तरको छलफलपछि उनले कांंग्रेसबाट औपचारिक रूपमा अलग भएको घोषणा गरेका हुन् । उनी रास्वपाबाट तनहुँ २ मा उपनिर्वाचन उठ्ने भएका छन् ।
वाग्लेले कांग्रेस दाइ, भाउजू, साला, भतिजको अक्षम गिरोहमा परिणत हुने क्रममा रहेको भन्दै गम्भीर आरोप लगाएका छन् ।

वाग्लेले लेखेका छन्–
वि.सं २०४२ सालको सत्याग्रहु र २०४६ को जनआन्दोलन देखिको मेरो संलग्नता एवं ५० वर्षदेखिको पारिवारिक विरासत गाँसिएको नेपाली कांग्रेस पार्टीबाट अलग हुने निर्णय गरेको छु। त्यस पार्टीभित्र ३० वर्षदेखि परोक्ष र गत १० वर्षदेखि प्रत्यक्ष रुपमा आर्थिक नीति र योजना, बौद्धिक सैद्धान्तिक विमर्श र प्रशिक्षण एवं अन्तर्राष्ट्रिय वैधताको विस्तारमा उल्लेख्य योगदान गरें।

विशेषतः योजना आयोगमा सुशील कोइराला र शेरबहादुर देउवा दुबैले दिनुभएका जिम्मेवारी कौशलका साथ सम्पन्न गरेर मुलुकको मान राख्न सकेकोमा गर्व छ। तर पछिल्ला वर्षहरुमा काँग्रेस पार्टीभित्रका गतिविधिहरु नियालेका प्रत्येक स्वाभिमानी कांग्रेसजनको शीर निहुरिने अवस्था आएको छ। जननायक बिपी कोइराला, गणेशमान सिंह, सुवर्ण शमशेर र किशुनजीको ऐतिहासिक दल अहिले दाइ, भाउजू, साला, भतिजको अक्षम गिरोहमा परिणत हुने क्रममा छ।

अब कांग्रेस कम्युनिष्टका असल मानिसहरु, दलमा आबद्ध नभएका स्वतन्त्रता र समुन्नतिका हिमायती, कुलीन राजनीतिको परिधिभन्दा बाहिर रहेका एवं विदेशमा बसेपनि नेपालको भलो चिताउने नेपालीहरु मिलेर बलियो वैकल्पिक लोकतान्त्रिक शक्तिको निर्माण गर्नुपर्छ। सुशासनको जगमा स्वच्छ लोकतन्त्र र आर्थिक उन्नतिको एजेण्डा बोक्दै २०८० को शुरुवातसँगै नयाँ सार्वजनिक भूमिकामा सक्रिय हुनेछु। आम नैराश्य चिरेर यो देश बन्छ भन्ने आशा जगाउने हो, बनाउने नै हो। जय नेपाल।