एसिसी प्रिमियर कपः कुशल र भीमको उत्कृष्ट प्रदर्शनमा नेपालको सानदार जित
काठमाडौं । एसिसी प्रिमियर कप क्रिकेट प्रतियोगिताअन्तर्गत नेपालले सानदार जित निकालेको छ । आफ्नो पहिलो खेलमा नेपालले मलेसियालाई ६ विकेट पराजित गरेको छ ।
नेपालका ब्याटर कुशल मल्ल र भीम सार्कीको कसिलो खेलमा १४ ओभर बाँकी छँदै नेपालले अन्तिम लक्ष्य पूरा गरेको छ । मल्लले ४० बलमा ७० रन बनाए । सार्कीले ९८ बलमा ७१ रन बनाएपछि नेपालले मलेसियालाई सजिलै हराएको हो । कुशलले पाँच छक्का र पाँच चौका प्रहार गरे । दीपेन्द्रसिंह ऐरीले तीन बलमा पाँच रन बनाए ।
नेपालका लागि कप्तान रोहितकुमार पौडेलले ४२ र ओपनर कुशल भुर्तेलले ३८ रन जोडेका थिए। ओपनर ब्याट्सम्यान आरिफ शेख तीन बल खेलेर एक रनमै आउट भए ।यसअघि टस जितेर पहिले ब्याटिङ गरेको मलेसियाले निर्धारित ५० ओभरमा नौ विकेटको क्षतिमा २३५ रन जोडेको थियो । मलेसियाका लागि कप्तान अहमद फैजले सर्वाधिक ७६ रन बनाए । उनलाई नेपालका बलर सन्दीप लामिछानेले आउट गरे । मलेसियाका विरेनद्वीप सिंहले ४६ रनको योगदान गरे ।
नेपालका लागि सोमपाल कामी र सन्दीप लामिछानेले समान तीन, ललित राजवंशीले दुई तथा गुल्सन झाले एक विकेट लिए ।