अब स्मार्ट लाइसेन्स १० वर्षमा नवीकरण गर्ने, कानुन संशोधन गरिँदै
काठमाडौं । सरकारले स्मार्ट लाइसेन्स अब १० वर्षमा नवीकरण गरे पुग्ने व्यवस्था लागू गर्ने तयारी गरेको छ । अहिलेसम्म पाँच पाँच वर्षमा अनिवार्य नवीकरण गर्नुपर्ने व्यवस्था थियो ।
भौतिक, पूर्वाधार तथा यातायात मन्त्री प्रकाश ज्वालाले मंगलबार पत्रकारहरूसँग कुराकानी गर्दै सरकारले चाँडै १० वर्षमा नवीकरण गरे पुग्ने गरी कानुन ल्याउन लागेको जानकारी दिए । उनले स्मार्ट लाइसेन्स वितरणलाई सहज र सरल बनाउने काम सरकारको प्रमुख प्राथमिकतामा रहेको दाबी पनि गरे ।
मन्त्री ज्वालाले सवारी साधनमा इम्बोस्ड नम्बरका विषयमा अंग्रेजीमा मात्रै प्रिन्ट भएकोमा आलोचना र गुनासो आएको भन्दै मन्त्रिपरिषदबाट निर्णय गरेर अंग्रेजी, नेपाली र नेपाली–अंग्रेजी दुवै प्रयोग गर्न पाउने व्यवस्था गरेकोसमेत बताए । अंग्रेजीमा मात्र इम्बोस्ड नम्बर प्रिन्ट गर्नुपर्ने भएपछि चौतर्फी आलोचना भएको थियो । सरकारले हालै दुवै भाषामा प्रिन्ट गर्न सकिने निर्णय गरेको थियो ।