रवि लामिछानेलाई चटके भन्ने बाबुराम भन्छन्– नयाँ वैकल्पिक शक्ति निर्माणमा लागौं
काठमाडौं । विगत चार दशकदेखि माओवादीमा रहेर राजनीति गर्दै दोस्रो संविधानसभाले संविधान जारी भएपछि पार्टी छिडेर हिँडेका बाबुराम भट्टराईले नै हो नेपालमा नयाँ वैकल्पिक शक्ति निर्माण आवश्यक छ भनेको । उनले माओवादी छाडेपछि आफ्नै नेतृत्वमा नयाँ शक्ति पार्टी खोले ।
जसमा केही युवाहरू पनि सामेल भए । तर दुई वर्ष नपुग्दै उनले त्यो पार्टीको नामोनिसान मेटाइदिए । २०७४ को निर्वाचनमा नेपाली कांग्रेसको सहयोगमा चुनाव जितेका बाबुराम यसबीचमा दुई तीनवटा पार्टी प्रवेश गरे । अन्ततः फेरि उनले नेपाल समाजवादी पार्टी खोले । मंसिरको निर्वाचनमा उनको पार्टीले आफ्नै चुनाव चिन्ह छाडेर माओवादीको चुनाव चिन्ह हँसिया हथौडा लियो । सो पार्टीबाट महीन्द्रप्रसाद यादवले सर्लाही २ मा चुनाव जिते । अहिले त्यो पार्टीको अस्तित्वसमेत छैन ।
अझै पनि बाबुराम नयाँ वैकल्पिक शक्ति निर्माण गरौं भन्न छाड्दैनन् । आफ्ना बचेखुचेका केही कार्यकर्ता माओवादीमा हुलेर उनी भने नयाँ शक्तिका रूपमा उदाएका राष्ट्रिय स्वतन्त्र पार्टीका सभापति रवि लामिछानेलगायतमाथि खनिएका छन् । हालै आयोजित एक कार्यक्रममा बाबुरामले रविलगायतलाई चटके भनेर अभिव्यक्ति दिएका थिए । उनले रास्वपालाई खहरे भनेका थिए । तर उपनिर्वाचनमा रास्वपाले शानदार जित हासिल गरेपछि अहिले उनी रास्वपा, जनमत पार्टी, नागरिक उन्मुक्ति पार्टीको प्रशंसा गर्न लागेका छन् ।
हिजोसम्म नयाँ दलका नेतालाई गाली गर्ने बाबुरामले बुधबार लेखेका छन्, ‘एक दशकदेखि देशमा नयॉ शक्ति वैकल्पिक शक्तिको पैरवीकर्ताको नाताले पछिल्लो चरणमा रास्वपा, जनमत, नागरिक उन्मुक्तिलगायतका नयॉ पार्टीहरूको उदय सकारात्मक ठान्दछु । सबैले एकअर्काका अनुभवबाट सिकौं। देशको अर्थ राजनीति र भूराजनीतिको विशिष्ठता अनुकूल नयॉ वैकल्पिक शक्ति निर्माणमा सहकार्य गरौं ।’ यसले पनि बाबुराममा अब सैद्धान्तिक विचलन आइसकेको प्रस्ट हुन्छ ।