सर्वेन्द्र खनाल र रमेश खरेल पाँच महिनौ दुईचोटि हारेर राखे रेकर्ड
काठमाडौं । नेपाल प्रहरीका दुई पूर्वअधिकृत सर्वेन्द्र खनाल र रमेश खरेल उपनिर्वाचनमा पनि लज्जास्पद पराजय बेहोरेका छन् । पाँच महिनामै दुई दुईचोटि पराजित भएर रेकर्ड राखेका पूर्वआईजी खनाल र पूर्वडिआइजी खरेल अबदेखि चुनावमा नउठ्ने मनस्थितिमा पुगेको बताइन्छ ।
मंसिर ४ गतेको निर्वाचनमा खनाल एमालेमा प्रवेश गरी काठमाडौं ६ बाट उम्मेदवार बनेका थिए । चुनावमा उनी राष्ट्रिय स्वतन्त्र पार्टीका शिशिर खनालसँग पराजित भएका थिए । तनहुँ १ मा रिक्त भएको प्रतिनिधिसभा सदस्यको निर्वाचनमा अनेक शक्ति लगाएर टिकट हात पारेका उनले मंसिरमा एमालेका एकबहादुर रानाले पाएको भन्दा आधा मत पनि ल्याउन सकेनन् । रानाले त्यसबेला २० हजार मत ल्याएका थिए । खनालले आठ हजार मात्र मत ल्याए ।
एमालेको १२ हजार मत रास्वपाका स्वर्णिम वाग्लेले लगेका छन् । विवादास्पद चरित्र भएका खनालले अब २०८४ को निर्वाचनमा टिकट नपाउने यी दुईवटै निर्वाचनले स्पष्ट पारेको छ । उनले पूर्वराष्ट्रपति विद्यादेवी भण्डारीको पावर लगाएर टिकट हात पारेका थिए । सोही कारण तनहुँका एमाले सबैको भोट खनालले पाउन सकेनन् । उनी सांसद अपहरण काण्डमा मुछिएका थिए ।
आफूलाई सदाचारी र सुशासनको अभियन्ता ठान्ने रमेश खरेलले त यसपटक जमानतसमेत जोगाउन सकेनन् । गत मंसिरमा काठमाडौं १ बाट निर्वाचन लड्दा उनले राम्रै मत पाएका थिए । त्यसबेला उनी नेपाल सुशासन पार्टी गठन गरेर चुनावमा गएका थिए । उनी नेपाल सुशासन पार्टीका अध्यक्ष पनि हुन् ।
तर यसपटक बारा २ मा उनी नेपाल स्वतन्त्र पार्टीबाट निर्वाचनमा उम्मेदवार बनेका थिए । खरेल नै रास्वपामा गएकाले नेपाल सुशासन पार्टी अहिले टुहुरो बनेको छ । बारा–२ मा खरेलसहित ३१ उम्मेदवारको जमानत जफत भएको छ। निर्वाचनमा कुल सदर मतको १० प्रतिशत मत नल्याउने उम्मेदवारको जमानत जफत हुने प्रावधान छ।
जसअनुसार रास्वपाका उम्मेदवार खरेलले पाएको मत ४.१४ प्रतिशत रहेकाले उनको जमानत जफत भएको हो। चितवन र तनहुँमा रास्वपाले चुनाव जिते पनि बारा २ मा भने नराम्रो ढंगले हारेको छ ।