महावीर पुनले भने– सरकारसँग वार्ता सकारात्मक छ, हाम्रो माग पूरा हुन्छ भन्ने लागेको छ
काठमाडौं । वैज्ञानिक महावीर पुनले सरकारसँग वार्ता सकारात्मक छ रहेकाले आफूहरूको माग पूरा हुने विश्वास गरेका छन् ।
आइतबार सिंहदरबारस्थित रक्षा मन्त्रालयमा उपप्रधानमन्त्री पूर्णबहादुर खड्कासँग भएको वार्ता सकारात्मक भएकाले आफ्ना माग पूरा हुने अपेक्षा बढेको उनले प्रतिक्रिया दिएका हुन् ।
‘उपप्रधानमन्त्री पूर्णबहादुर खड्काज्यूसँग वार्ता भइरहेका बेला पनि प्रधानमन्त्रीले दुई दुईपटक फोन गर्नुभयो । सरकारसँगको वार्तामा आन्दोलनमा उठेका माग कसरी सम्बोधन गर्ने भन्ने विषयमा कुराकानी भएको छ । सम्भव भएसम्म रातारात आजै र नभए भोलिसम्म आन्दोलन रोक्न कसरी माग सम्बोधन गर्ने भन्नेमा सरकार गम्भीर देखिएको छ,’ पुनले सञ्चारकर्मीसँग भने ।
नवप्रवर्तन र आविष्कारको क्षेत्रमा सरकारले निश्चित बजेट छुट्याउनुपर्ने भन्दै वैज्ञानिक धर्नामा उत्रिएका हुन् । उनी दुई दिनदेखि माइतीघर मण्डलामा धर्नामा बसेका छन् । उनको माग पूरा गर्न भन्दै चौतर्फी आवाज उठेपछि उपप्रधानमन्त्री खड्काले आफैंले वार्ताको पहल थालेका हुन् ।
सरकारले माग सम्बोधन गर्ने प्रतिबद्धता जनाएकाले वैज्ञानिक पुनको आन्दोलन स्थगित हुने भएको छ ।वार्तामा वैज्ञानिक पुनले राखेका मागबारे छलफल गर्न आजै साँझ ५ बजेसम्म वार्ता टोली गठन गर्ने र वार्ता सुरु गर्ने सहमति भएको छ ।
