राष्ट्रपति पौडेलको सट्टा परराष्ट्रमन्त्री साउद बेलायत जाने
काठमाडौं । बेलायतका राजा चार्ल्स तृतीयको राज्याभिषेक समारोहमा सहभागी हुन परराष्ट्रमन्त्री एनपी साउद बेलायत जाने भएका छन् । यसअघि राष्ट्रपति रामचन्द्र पौडेल राज्याभिषेक समारोहमा सहभागी हुन जाने तय थियो । तर‚ स्वास्थ्यका कारण राष्ट्रपति पौडेल जान नसक्ने भएपछि सरकारले परराष्ट्रमन्त्री साउदलाई बेलायत पठाउन लागेको हो ।
परराष्ट्रमन्त्री वैशाख २१ गते लन्डन गएर २४ मा फर्कनेछन् । परराष्ट्रमन्त्री भएपछि साउदको यो नै पहिलो विदेश भ्रमण हुने भएको छ । पौडेल जान नसक्ने भएपछि नेपालका राष्ट्रप्रमुखको २० वर्षपछि हुन लागेको बेलायत भ्रमण स्थगित भएको हो । आगामी वैशाख २३ गते लन्डनको वेस्टमिनिस्टर गिर्जाघरमा हुने राज्याभिषेक समारोहमा हुनेछ । बकिंघम राजप्रासादका अनुसार राज्याभिषेक समारोहमा झन्डै दुई हजार पाहुनालाई आमन्त्रण गरिएको छ ।
समारोहमा संसारभरका राजनेता, राष्ट्र तथा सरकार प्रमुख, राजारानी एवं राजपरिवार सदस्य, विश्वका विभिन्न देशका प्रतिष्ठित व्यक्ति उपस्थित हुने अपेक्षा छ ।