भारत र पाकिस्तानसँग क्रिकेट खेल्ने सपना पूरा भयो- कप्तान पौडेल
काठमाडौँ । नेपाली राष्ट्रिय क्रिकेट टिमका कप्तान रोहितकुमार पौडेलले भारत र पाकिस्तानसँग क्रिकेट खेल्ने सपना पूरा भएको प्रतिक्रिया दिएका छन् ।
मंगलबार एसिसी प्रिमियर कपको फाइनलमा युएईलाई ७ विकेटले पराजित गर्दै नेपाल एसिया कपमा छनोट भएको हो । आगामी सेप्टेम्बरमा हुने एसिया कपमा अब नेपालले भारत र पाकिस्तान सम्मिलित समूहमा प्रतिस्पर्धा गर्नेछ ।
खेलपछि प्रतिक्रिया दिदै कप्तान पौडेलले प्रतियोगिता जितेकोमा खुशी लागेको बताए ।
पौडेलले भने- ‘प्रतियोगिता जितेर एसिया कपमा छनोट हुँदा एकदमै खुसी लागेको छ । हामीले जुन हिसाबले खेलेका थियौं त्यहीअनुसारको नतिजा आयो । एसिया कप हाम्रा लागि ठूलो छ। सानैदेखि भारत-पाकिस्तानको खेल हेर्दै आयौं । आज भारत पाकिस्तानसँग खेल्ने अवसर पाएका छौं । खुशी छौं ।’
पौडेलले नेपालको लागि एसिया कपको एकदमै महत्व रहेको बताए । उनले अब नेपाली क्रिकेट झनै राम्रो हुने बताए ।
भारत र पाकिस्तानबीचको राजनीतिक तनावका कारण एसिया कप आयोजना बारे अन्योल रहेको छ ।
एशिया कप हुनुपर्ने भन्दै उनले भने, ‘हामीले एसिया कपका लागि यही धेरै मेहनत गरेका छौं । अब भारत, पाकिस्तान वा युएई जहाँ भए पनि एसिया कपमा खेलाउनु पर्छ ।’