कांग्रेस रूपान्तरण अभियानले जेठ १६ गते अन्तर्क्रिया कार्यक्रम
काठमाडौं । नेपाली कांग्रेसको रूपान्तरण अभियानमा लागेका नेताहरूले जेठ १६ गते वाग्मती प्रदेशमा अन्तर्क्रिया कार्यक्रम गर्ने भएका छन् । त्यसको तयारीका लागि आइतबार बत्तिसपुतलीस्थित अनुपम फुडल्यान्डमा बैठक बसेको छ । नेता जगदिश्वरनरसिंह केसीले अन्तर्क्रियामा कांग्रेसलाई कसरी रूपान्तरण गर्ने बारे विस्तृत छलफल गरिने जानकारी दिए । उनले पार्टीको १५औँ महाधिवेशन र २०८४ सालको चुनावलाई ध्यानमा राखी रूपान्तरण र शुद्धीकरण अभियान आवश्यक भएको बताए ।
आगामी जेठ १६ गते हुने अन्तर्क्रिया कार्यक्रममा कांग्रेसलाई कसरी रूपान्तरण गर्नेबारे विस्तृत छलफल गरिने, मतदाताले हामीलाई सुक्ष्म रूपमा हेरिरहेको हुनाले अब यही स्थितिमा २०८४ सालमा चुनावमा जान सकिँदैन । अब हामीले नेपाली कांग्रेसलाई रूपान्तरण गर्नैपर्छ, उनले भने । उनले रूपान्तरण अभियान गुटको नभएको बरु नेपाली कांग्रेसको साझा कार्यक्रम भएको बताए ।