बजेट बनाउँदा प्रधानमन्त्री र अर्थमन्त्रीबीच भेटै भएनछ – सत्तारूढ दल सांसद
काठमाडौँ । सत्तारूढ दल नेकपा (माओवादी केन्द्र)का सांसद महेन्द्रबहादुर शाहीले सरकारले अघि सारेको नीति तथा कार्यक्रम र बजेटबीच तादात्म्य नमिलेको बताएका छन्।
प्रतिनिधि सभाको आइतबारको बैठकमा बोल्दै उनले बजेट बनाउँदा प्रधानमन्त्री र अर्थमन्त्रीबीच भेटै नभएजस्तो अनभूति हुन पुगेको बताए।
‘सरकाले बजेट सदनमा पेश गरेको छ। सरकारको नीति तथा कार्यक्रम र बजेट हेर्दा मेल खाएजस्तो लाग्दैन। सायद प्रधानमन्त्री र अर्थमन्त्रीबीच भेट भएन कि भन्ने अनुभूति भइरहेको छ। नीति तथा कार्यक्रम एकातिर छ, बजेट केन्द्रित अर्कोतिर भएको मैले यहाँ अनुभूति गरेको छु,’ उनले भने।
अहिलेको आर्थिक संकट नै मुख्य चुनौती भएकाले त्यसबाट पार पाउन गरी बजेट आउनुपर्ने उनले बताए।
त्यस्तै सरकारले बजेटमार्फत लगानीको क्षेत्र बढाउनुपर्ने पनि बताए।
कृषिलगायत क्षेत्रमा विदेशी लगानी भित्र्याउनका लागि मैत्री वातावरण बनाउनुपर्नेमा उनको जोड थियो।
उनले करको दायरा होइन लगानीको क्षेत्र बढाएर मात्र उत्पादन र उत्पादकत्व बढाउन सकिने बताए।