टोखा भगवती क्लबलाई सिन्धुकप फुटबलको उपाधि

काठमाडौं । नवौँ सिन्धुकप फुटबल प्रतियोगिताको उपाधि टोखा भगवती युथ क्लबले जितेको छ । सिन्धुपाल्चोकको लामोसाँघुमा शनिबार भएको फाइनल खेलमा काभ्रे फुटबल संघलाई टाइब्रेकरमा ५–३ ले पराजित गर्दै टोखा भगवती युथ क्लबले उपाधि जितेको हो ।

त्यसअघि, निर्धारित ९० मिनेटको खेलमा दुई टोलीबीच १–१ गोलको बराबरी भएपछि खेल टाइब्रेकरमा गएको थियो । उपाधिसँगै टोखा भगवती युथ क्लबले रु दुई लाख, मेडल र ट्रफी हात पारेको छ भने उपविजेता काभ्रे फुटबल संघले एक लाख रुपैयाँमा चित्त बुझाएको छ । विजेता–उपविजेतासहितका टोलीलाई स्वास्थ्यमन्त्री मोहनबहादुर बस्नेतले मेडल प्रमाणपत्र प्रदान गरे ।