केकीको ‘बोक्सीको घर’ वैशाखमा

काठमाडौँ । अभिनेत्री केकी अधिकारीको अभिनय तथा निर्माण रहेको फिल्म ‘बोक्सीको घर’ वैशाखमा प्रदर्शनमा आउने भएको छ । वितरकसँगको छलफलबाट फिल्मको रिलिज मिति नयाँ वर्षको वैशाख १४ गतेका लागि तय भएको निर्माता समेत रहेकी अभिनेत्री केकीले जानकारी दिइन् । केकीकै होम प्रोडक्सनमा निर्माण भएको फिल्म ८ वर्षअघि मञ्चन भएको चर्चित नाटक ‘बोक्सीको घर’माथि रहेर बनेको हो । नाटककै लेखक एवं निर्देशक सुलक्षण भारतीले फिल्म पनि निर्देशन गरेका हुन् ।

फिल्ममा केकीका अलवा सुपला सापकोटा, स्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको अभिनय छ । महिलालाई बोक्सीको आरोप लगाई समाजले उनीहरूमाथि गर्ने शोषणको वरिपरि रहेर फिल्म बनेको छ । सामाजिक–थ्रिलर जनरामा निर्माण भएको फिल्मले समाजमा प्रचलित कुप्रथालाई चित्रण गर्ने केकीले बताइन् । नेपालसहित विभिन्न देशमा एकसाथ प्रदर्शनमा आउने फिल्म केही अन्तर्राष्ट्रिय फेस्टिभलमा समेत लैजाने योजना केकीको छ । कार्यकारी निर्माता राजकुमार घिमिरे रहेको फिल्ममा शिवराम श्रेष्ठको छायाङ्कन, लोकेश बज्राचायको सम्पादन छ । फिल्मको वितरण टिफल्क फिल्मस्ले गर्नेछ ।