सन्दीपको मुद्दा ‘हेर्दा हेर्दै’मा
काठमाडौं । उच्च अदालत पाटनका न्यायाधीशद्वय सुदर्शनदेव भट्ट र अन्जु उप्रेती ढकालको संयुक्त इजलासमा परेको बलात्कार अभियोगमा दोषी ठहर भएका क्रिकेटर सन्दीप लामिछानेको मुद्दा ‘हेर्दा हेर्दै’मा परेको छ । मुद्दा हेर्दा हेर्दैमा राखिएपछि त्यही इजलासले टुंग्याउने न्यायिक अभ्यास छ ।
अब न्यायाधीशद्वय भट्ट र उप्रेतीको इजलासले नै सन्दीपको मुद्दाको फैसला गर्ने छ । गत पुस २५ गते जिल्ला अदालत काठमाडौंबाट बलात्कार मुद्दामा दोषी ठहर भएका सन्दीपले फागुनमा उच्च अदालत पाटनमा पुनरावेदन गरेका थिए । उनको पुनरावेदनपछि सरकारी वकिलले पनि सन्दीपबाट पीडित भएकी गौशाला २६ (छ) नाबालिग भएको र सन्दीपलाई सजाय कम भएको भन्दै पुनरावेदन गरेको थियो ।