कांग्रेसले रामहरि खतिवडालाई संसदीय सुनुवाइ समितिको सभापति बनाउने
काठमाडौं । नेपाली कांग्रेसले संसदीय सुनुवाइ (संयुक्त) समितिको सभापति पदका लागि सांसद रामहरि खतिवडालाई उम्मेदवार बनाउने निर्णय गरेको छ।
कांग्रेसका प्रमुख सचेतक श्याम घिमिरेले खतिवडालाई सभापति बनाउने निर्णय भएको जानकारी दिए। यसअघि सभापति ईश्वरीदेवी न्यौपानेले भदौ १० गते राजीनामा दिएपछि उक्त पद रिक्त थियो। सभापति चयनका लागि शुक्रबार निर्वाचनको मिति तोकिएको छ। उम्मेदवारी दर्ताको समय आज दिउँसो २ देखि ४ बजेसम्म निर्धारण गरिएको छ।
खतिवडा यसअघि राज्यव्यवस्था तथा सुशासन समिति सभापति थिए। निजामती विधेयकमा ‘कुलिङ अफ पिरियड’ प्रावधानसम्बन्धी गडबडीको छानबिन गर्न गठित समितिको प्रतिवेदन सार्वजनिक भएपछि उनले उक्त पदबाट राजीनामा दिएका थिए।