सिजी परिवारलाई निर्वाणको पत्र, अराजक आक्रमणले भवन जले पनि सपना जिउँदै छन्,अझै बलियो हुनेछौं

पछिल्ला केही दिन हाम्रो कम्पनीको इतिहासका सबैभन्दा पीडादायी दिनहरू बनेका छन् । जवाफदेहीपन र परिवर्तनको माग गर्दै सुरु भएको युवाहरूको आन्दोलनको उद्देश्य राम्रो थियो तर अराजक तत्व र बाह्य शक्तिहरूद्वारा विकृत र अपहरण गरियो। शान्तिपूर्ण ढंगले समृद्ध नेपालको आह्वान हुनुपर्ने कुरा हिंसा, लुटपाट र विनाशमा परिणत भयो । हामीले आश्चर्यमा पार्ने क्रूरता देख्यौं । हाम्रो अध्यक्ष (विनोद चौधरी) लाई व्यक्तिगत रूपमा निशाना बनाइयो। हाम्रो पारिवारिक घरहरूमा आक्रमण गरियो र जलाइयो । हाम्रो कारखाना र कार्यालयहरू नष्ट गरियो र हाम्रा सोरुमहरू लुटिए । दशकौँको मेहनत, त्याग र प्रतिबद्धता केही घण्टामै खरानीमा परिणत भयो । यो केवल सम्पत्तिमाथि आक्रमण थिएन, यो आशा, विश्वास र राष्ट्रका लागि केही अर्थपूर्ण निर्माण गर्ने अवधारणामाथि आक्रमण थियो। तर पनि, यिनै अँध्यारा क्षणहरूमा असाधारण कुरा भयो । आगो र अराजकताको बीचबाट सीजीको वास्तविक आत्मा उजागर भयो । म हाम्रो नेतृत्वकर्ताहरू, प्रबन्धकहरू र कर्मचारीहरूले आफ्नै सुरक्षाको खतरा मोलेर दिनरात मेहनत गर्दै जति सकिन्छ सम्पत्ति जोगाएको र हाम्रा ग्राहकप्रतिको सीजीको वाचा पूरा गरेर काम गरेको रिपोर्ट पढ्दैछु, कथाहरू सुन्दैछु । आगो दन्किँदै गर्दा पनि हाम्रा मानिसहरूले हार मानेनन् । जसले वरिपरिको सबै कुरा भत्किँदै गर्दा पनि अटल रहनुभयो तपाईंहरू प्रत्येकलाई म सलाम गर्छु । तपाईंहरूले संसारलाई देखाउनुभएको छ सीजी केवल एउटा कम्पनी मात्र होइन, बरु दृढता, निष्ठा र साहसले बाँधिएको परिवार हो । तपाईंहरूको कारणले विनाशको बीचमा पनि हाम्रा ग्राहकहरू त्यागिएका छैनन् । तपाईंहरूको कारणले आशा जीवित छ र उचित समय आएपछि तपाईंहरूको सेवा, त्याग र तपाईंहरूको शक्ति हामी सबै मिलेर सम्मान गर्नेछौं । हो, हामी घाइते छौं । हामी हल्लिएका छौं । तर हामी भाँचिएका छैनौं । ती अराजकहरूले हाम्रो भवन जलाउन सक्छन्, तर उनीहरूले हाम्रो सपना जलाउन सक्दैनन् । उनीहरूले हाम्रो सोरुम लुट्न सक्छन् तर हाम्रो मूल्यहरू लुट्न सक्दैनन् । उनीहरूले हामीलाई कमजोर पार्ने प्रयास गर्न सक्छन्, तर उनीहरूले हाम्रो परिवारको एकतालाई तोड्न सक्दैनन् । हामीले पनि याद गर्नुपर्छ हामी को हौं । चौधरी समूह नेपालको सबैभन्दा ठूलो करदाता हो, सबैभन्दा ठूलो रोजगारी दिने समूहमध्ये एक हो र राष्ट्र निर्माता हो । प्रत्येक संकटमा हामी जनताको अग्रमोर्चामा उभिएका छौं चाहे भूकम्प होस्, बाढी होस् वा महामारी । त्यो मिशन सकिएको छैन । त्यो जिम्मेवारी कमजोर भएको छैन । त्यो उद्देश्य हराएको छैन । हामी पुनः निर्माण गर्नेछौं । हामी पुनः उठ्नेछौं र हामी पहिलेभन्दा अझै सबल भएर अघि बढ्नेछौं । यो त्रासदीबाट पुनर्जागरण हुनेछ । नयाँ शक्ति, नयाँ विचार, नयाँ प्रणाली र नेपालको जनताप्रतिको अझ गहिरो प्रतिबद्धता व्यक्त गर्दछौं । इतिहासले हामीलाई डढाइदिने आगोलाई सम्झने छैन । सम्झनेछ त केबल हामी कसरी त्यस आगोबाट बाहिरियौं, अझ बलिया, अझ गर्विलो र अझ एकताबद्ध भयौं भनेर । सीजी परिवारका प्रत्येक सदस्यलाई धन्यवाद । तपाईंहरू नै यो संस्थाको मुटु हुनुहुन्छ । हामी मिलेर केवल बाँच्छौं मात्र होइन उज्ज्वल भविष्य निर्माण गर्नेछौं
(चौधरी सीजी ग्रुपका प्रबन्ध निर्देशक हुन् ।)