रामेश्वर खनालले सरिता शर्मासँग गरे दोस्रो विवाह

काठमाडौं । पूर्व अर्थसचिव रामेश्वर खनालले सरिता शर्मा पोखरेलसँग दोस्रो विवाह गरेका छन् । चार वर्षअघि श्रीमती सुचित्रा खनालको निधनसँगै खनाल एकल भएका थिए । खनालको एक्ली छोरी छिन् । सरिता शर्मा पोखरेलको श्रीमानको पनि १९ वर्षअघि निधन भएको थियो । उनको पनि एक्ली छोरी छिन् । ‘उनी धेरै वर्षदेखि एक्लो जीवन विताईरहेकी रहिछन् । साथीहरुले अलि अगाडि नै कुरा ल्याएका थिए, शुरुमा मैले मानिन, पछिल्लो समय मैले पनि एक्लो महसुश गरे, समझदारीमा लिभिङ टुगेदर रोजेका हौ ।
खनालको एक्ली छोरी पनि भारतको नयाँ दिल्लीमा बसेर अध्ययन अनुसन्धान गरिरहेकी छिन् । खनाल घरमा एक्लै बस्दथे । ‘दिनभरी त यता उता गइन्छ, काम गरिन्छ, व्यस्त हुँदा एक्लो अनुभव हुँदैन रहेछ, तर बेलुका घर फर्केपछि एक्लो अनुभूति हुने, डिप्रेसन होला, अरु अरु रोगले सताउला भन्ने मनमा आउन थाल्यो’ सरिताको पनि त्यस्तै समस्या, उनकी छोरी पनि एमबिबिएस सकेर एमडी गर्न जापान जानै लागिन् । श्रीपञ्जमीको दिन पारिवारिक सदस्यहरुबीच केक काटेर लिभिङ टुगेदरको आरम्भ गरेको खनालले बताए । ‘यसलाई विवाह नभनौ । लिभिङ टुगेदर हो, उनले भने । खनालकी नयाँ पत्नि सरिता ४७ वर्षकी भइन् । ‘उनी भन्दा म १७ वर्ष जेठो छु,’ खनालले भने ।सरिताको गृह जिल्ला दाङ हो । उनी पूर्व मन्त्री तथा नेपाली काँग्रेसका नेता बलदेव मजगैयाकी भतिजी हुन् । छोरीलाई पढाउने क्रममा सरिता पछिल्लो समय काठमाडौंमा बस्दै आएकी थिइन ।