कांग्रेस सांसद शर्माको आरोप – अहिलेको सरकार आतंककारीहरूको सरकार हो
काठमाडौं । सत्तारुढ दल नेपाली कांग्रेसका सांसद सुनिल शर्माले अहिलेको सरकार आतंककारीहरुको सरकार भएको बताएका छन् । आइतबार नयाँ बानेश्वरमा बसेको संसदीय दल बैठकमा उनले यस्तो आरोप लगाएका हुन् ।
आफूलाई प्रहरीले पक्राउ पुर्जीबिनै सीआईबीले पक्राउ गरेको समेत बताए । शैक्षिक प्रमाणपत्र कीर्ते आरोपमा उनलाई सिआइबीले नियन्त्रणमा लिई एक रात हिरासतमा राखेको थियो । शर्मालाई थुनाबाहिरै राखेर अनुसन्धान गर्न अदालतले आदेश दिएपछि उनी थुनामुक्त भएका थिए ।
सांसद शर्माले अहिलेको सरकारमा कांग्रेस छ कि छैन भन्ने प्रश्न समेत गरे । उनले भने, ‘मैले मान्छे मारेको छैन, सुन तष्करी गरेको छैन । तैपनि मलाई पक्राउ गरियो, हातपात गरियो । अहिलेको सरकार आतंककारीहरूको सरकार हो ।’
उनले सभापति शेरबहादुर देउवालाई पितासमान सम्मान गरेको बताउँदै आफूलाई संसदमा बोल्न समय नपाएको समेत गुनासो गरे । प्रमुख सचेतक रमेश लेखकले बोल्न समय नदिएको उनको आरोप छ । ‘मलाई संसद बैठकमा बोल्न समय दिइएको छैन,’ उनले भने, ‘बोल्न दिइएन भने म विद्रोह गर्छु ।’
उनले बोल्न समय माग गर्दै संसदमा सभामुखसँग आग्रह गर्ने पनि बताए । उनले भने, ‘सभामुखले बोल्न समय दिनुभएन भने म उभिइरहन्छु ।’ आफूले संसदमा बोल्न समय नपाएपछि सञ्चार माध्यमहरूमा बोल्नुपरेको उनको भनाइ छ ।
उनले प्रमुख प्रतिपक्षी नेकपा एमालेका अध्यक्ष केपी शर्मा ओलीलाई भेटेकोबारे पनि स्पष्टीकरण दिए । उनले आफूलाई सहयोग गरेकाले ओलीलाई भेटेको बताए । अर्थमन्त्री र गृहमन्त्रीको राजीनामा माग गरेको विषयलाई उनले नीतिगत कुरा भएको बताए । ‘प्रकाशशरण महतसँग मेरो व्यक्तिगत दुश्मनी छैन’ उनले भने, ‘तर विभिन्न प्रकरणमा नीतिगत कुरा उठान गरेर राजीनामा मागेको हुँ ।’