कुम्भेश्वर महिला साकोसको साधारणसभा सम्पन्न

ललितपुर । कुम्भेश्वर महिला बचत तथा ऋण सहकारी संस्थाको १३औं बार्षिक साधारण सभा ललितपुर महानगरपालिकाकी उपमेयर मन्जली शाक्य बज्राचार्यको प्रमुख आतिथ्यतामा साधारणसभा सम्पन्न भएको छ । सभामा शुभकामना मन्तव्य राख्दै उनले केही सहकारी संस्थाले गरेको गलत कार्यका कारण सिङ्गो सहकारी अभियानप्रति नै सदस्यको अविश्वास बढेको बताइन् । सहकारी मुल्य, मान्यता र सिद्धान्तमा आधारित भएर सञ्चालन भएका सहकारी संस्थामा कुनै समस्या नरहेको भन्दै उनले समुदाय र सदस्य केन्द्रीत सहकारीमा मात्र वित्तीय कारोबार गर्न आग्रह गरिन् । ब्याजको लोभमा भन्दा पनि सहकारीका सञ्चालक र उनीहरुको आचरणलाई चिनेर मात्र कारोबार गर्न उनको सुझाव छ । ‘सदस्यबाट संकलन गरेको पुँजीलाई सञ्चालकहरुले कुन कुन क्षेत्रमा लगानी गरेका छन्, सञ्चालकहरुको गतिविधि कस्तो छ, त्यसलाई बुझेर चनाखो भई कारोबार गर्नुपर्छ ’ उनले भनिन्, ‘सहकारीका सञ्चालकहरु पनि सदस्यहरुप्रति उत्तरदायी र जवाफदेही हुनुपर्छ । सभामा संस्थाकी अध्यक्ष बिन्जु खड्गीले अध्यक्षको तर्फबाट प्रतिवेदन प्रस्तुत गर्दै समुदायमा रहेका महिलाहरुलाई संस्थामा आवद्ध गराई उनीहरुमा नियमित बचत गर्ने बानी विकासको गरेको बताइन् ।

संस्थाले संकलित पुँजी सदस्यहरुको आर्थिक स्तर माथि उकास्नको लागि उत्पादन तथा आयमूलक क्षेत्रमा लगानी गर्दै आएको उनको भनाई छ। संस्थाले सदस्यहरुलाई सीपमूलक तालिम दिनुका साथै अनौपचारिक शिक्षाको माध्यमबाट महिला सशक्तिकरणमा समेत काम गर्दै आएको उनले सभामा जानकारी दिइन् । सभामा सचिव सफलता खड्गीले आर्थिक बर्ष २०७९र८० को बार्षिक प्रतिवेदन प्रस्तुत गरेकी थिइन् । संस्थाले यस आर्थिक बर्षमा बाल बचत कर्ताहरुलाई जन्म दिनको अवसरमा बर्थ–डे केक प्रदान गर्ने, स्वास्थ्य शिविरको आयोजना गर्ने, जेष्ठ सदस्यलाई दशैं भत्ता प्रदान गर्ने, आवश्यकताका आधारमा सिप विकास तालिम प्रदान गरी सदस्यको आर्थिक स्तरमा वृद्धि गर्ने र नारी बचतकर्ताहरुको लागि विशेष कार्यक्रम सञ्चालन गर्ने उनले सभामा बताइन्। संस्थाकी कोषाध्यक्ष शान्त लक्ष्मी खड्गीले आर्थिक बर्ष २०७९।८० को आर्थिक प्रतिवेदन प्रस्तुत गर्दै शेयर पुँजी १ करोड २२ लाख २६ हजार ,जगेडा तथा अन्य कोषमा २३लाख ८७ हजार ,बचत संकलन १२ करोड ५२ लाख ८९ हजार र ऋण लगानी १७ करोड ६ लाख ७१ हजार पुगेको सभामा जानकारी दिइन् । संस्थामा गत असार मसान्तसम्म ८१३ जना सदस्य आवद्ध रहेका छन् ।

सो अवसरमा उनले सदस्यहरुलाई कुम्भेश्वर सहकारी के हो र कुम्भेश्वरमा नै किन बचत गर्ने रु भन्ने विषयमा प्रस्तुतीकरण समेत गरेकी थिइन् । कुम्भेश्वर सहकारीले समुदायमा आधारित भई सदस्य केन्द्रीत वित्तीय कारोवार गर्दै आएको, सदस्य माझमा मात्र वित्तीय परिचालन गर्ने गरेको, सदस्यमैत्री क्रियाकलाप गर्दै आएको र महिला सशक्तिकरणको लागि पनि महत्वपुर्ण भूमिका खोलको भन्दै संस्थामा नियमित कारोवार गर्न आग्रह गरिन् । वित्तीय संकटको बेलामा समेत संस्थाले तरलता व्यवस्थापन गरी सदस्यहरुको आवश्यकता अनुसार बचत फिर्ता गर्नुका साथै सदस्यको माग अनुसार ऋण लगानी गरेकाले संस्था सुरक्षित रहेको भन्दै ढुक्क भएर कारोवार गर्न उनको आग्रह छ । सभामा उत्कृष्ट बचतकर्ता रेनुका खड्गी, उत्कृष्ट ऋणीमा लक्ष्मी लेप्चा र कमल खड्गीलाई सम्मान गरिएको थियो । त्यसैगरी साधारण सभाको अवसरमा संस्थाले स्थानिय युवाहरुलाई बाद्यबादनको सामग्री समेत हस्तान्तरण गरिएको थियो ।
शान्त लक्ष्मी खड्गीको अध्यक्षतामा नयाँ सञ्चालक समिति चयन
सभाले आगमी ४ बर्षे कार्यकालको लागि शान्त लक्ष्मी खड्गीको अध्यक्षतामा नयाँ सञ्चालक समित समेत चयन गरेको छ। संस्थाको सचिवमा सफलता खड्गी, कोषाध्यक्षमा रंगीता खड्गी र सदस्यहरुमा रजनी खड्गी, जरीना खड्गी, शर्मिला खड्गी र गायत्री शाही निर्वाचित भएका छन् । सभाले लेखा सुपरीवेक्षण समितिको संयोजकमा मोनिका खड्गी तथा सदस्यहरुमा ग्रिश्मा शाही र सुधिरा शाही खड्गीलाई सर्वसम्मत चयन गरेको छ।