ॐ हस्पिटल एण्ड रिसर्च सेन्टरमा सिएमई कार्यक्रम सम्पन्न

काठमाडौं । चावहिलस्थित ॐ हस्पिटल एण्ड रिसर्च सेन्टरमा क्रिटिकल केयर नर्सेस् एसोसिएशनको कन्टिन्यूड मेडिकल एडुकेशन (सिएमई) कार्यक्रम सम्पन्न भएको छ । सिएमईले सघन उपचार कक्षमा कार्यरत नर्सहरुको ज्ञान र सीप अभिवृद्धिमा सहयोग पुग्ने अपेक्षा गरिएको छ । कार्यक्रमलाई सम्बोधन गर्दै ॐ हस्पिटलका सघन उपचार विशेषज्ञ तथा क्रिटिकल केयर डेभलपमेन्ट फाउण्डेशनका संस्थापक सदस्य डा. प्रमेश सुन्दर श्रेष्ठले नेपालको सघन उपचार बिगतको तुलनामा निकै स्तरिय भएको दाबी गर्नुभयो । स्वागत मन्तव्यका क्रममा ॐ हस्पिटलकी नर्सिङ डाइरेक्टर उमा श्रेष्ठले ॐ हस्पिटलले नर्सहरुको यस किसिमका सिएमई नियमित रुपमा गर्दै आएको जिकिर गर्नुभयो । नर्सहरुले उपचार सीपको स्तर बृद्धिसँगै आफ्नो बानी ब्यहोरामा पनि सुधार गरेर ‍सेवा गर्नुपर्नेमा उहाँको जोड छ । मन्तव्यका क्रममा क्रिटिकल केयर नर्सेस् एसोसिएशनकी अध्यक्ष विमला श्रेष्ठले सघन उपचारमा काम गर्ने नर्सहरुलाई लक्षित गरेर आयोजित सिएमई अत्यन्त प्रभावकारी रहेको र उपचारका सिलसिलामा उपयोगि विषयहरु सधैं प्रभावकारी हुने बताउनुभयो।

ॐ हस्पिटलकी क्रिटिकल केयर नर्सिङ इन्चार्ज तथा क्रिटिकल केयर नर्सेस् एसोसिएशन अफ नेपालकी सह कोषाध्यक्ष सविना ढकालले यस किसिमका शिक्षाप्रद कार्यक्रमहरुमा नर्सहरुको सहभागित स्वस्फुर्त रुपमा हुनुपर्ने र आफैं जागरुक भएर सहभागि हुन नर्सहरुलाई आग्रह गर्नुभयो । सिएमईमा सघन उपचार कक्षमा क्रिटिकल केयर नर्सका रुपमा काम गर्दा आइसियुमा ए.आर.डि.एस. (अक्युट रेस्पिरेटोरी डिस्ट्रेस सिन्ड्रोम) को ब्यवस्थापन बारे त्रि.बि. शिक्षण अस्पतालमा कार्यरत नर्सिङ सुपरभाईजर पार्वता भट्टराईले प्रस्तुति दिनुभएको थियो । शहीद गंगालाल राष्ट्रिय हृदयरोग केन्द्रकी क्रिटिकल केयर नर्स विनिता थापाले ए.सि.एस.एम (अक्युट कोरोनरी सिन्ड्रोम म्यमनेजमेन्ट) बारे प्रस्तुति दिनुभएको थियो । त्यसैगरी, ॐ हस्पिटलको सघन उपचार विभागका कार्यरत क्रिटिकल केयर नर्स रोशनी श्रेष्ठले आइसियु नर्सहरुकालागि मानसिक स्वास्थ्य सचेतनाबारे प्रस्तुति दिनुभएको थियो । आइसियु नर्सहरुलाई नयाँ प्रविधि र ज्ञानबारे जानकारी गराएर विरामीको स्याहार सुसारकालागि दक्ष बनाउन नियमित रुपमा संचालन गरिँदै आएको सिएमईमा यसपटक भने उपत्यकाका बिभिन्न अस्पतालको सघन उपचार कक्षमा कार्यरत ६० जना नर्सहरुको सहभागिता रहेको थियो ।