भदौ ७ देखि प्रदर्शनमा आउँने चलचित्र ‘नमेटिने घाउ’ को फर्स्टलुक पोस्टर सार्वजनिक
काठमाडौँ । भदौ ७ गतेदेखि देशव्यापी प्रदर्शनमा आउँन लागेको सत्य घटनामा आधारित चलचित्र ‘नमेटिने घाउ’ को फर्स्टलुक पोस्टर सार्वजनिक भएको छ ।
फिल्मका निर्माता एवं निर्देशक रमित ढुंगानाले सामाजिक सञ्जाल फेसबुक मार्फत पोस्टर सार्वजनिक गरेका हुन् । पोस्टरमा प्रधानमन्त्री केपी शर्मा ओलीदेखि प्रहरी र फिल्मका कलाकारहरू देखिएका छन् । एसिड पीडितको पीडाभाव दर्शाइएको पोस्टरमा प्रधानमन्त्री केपी शर्मा ओली औँला ठड्याउँदै चेतावनी शैलीमा प्रस्तुत भएका छन् ।
एसिड आक्रमणमा परेका ३३ जना पीडितहरूको कथामा आधारित फिल्ममा प्रधानमन्त्री ओलीसहित पूर्व प्रधानमन्त्री माधव नेपाल, राप्रपाका सांसद ज्ञानेन्द्र शाही, मुस्कान खातुन, रचना गौतम, प्राप्ति पौडेल, इभा गिरी, कमल देवकोटा, सन्दीपबाबु लोहनी, प्रभात पल ठकुरी, आरती आचार्य, सुरवीर पण्डित, सुनिल कटुवाल, अपेक्षा न्यौपाने, क्रान्ति शाह लगायतको अभिनय छ ।
रमित ढुंगाना फिल्म प्रोडक्शनको ब्यानरमा निर्माण भएको ‘नमेटिने घाउ’मा नीरज कँडेलको छायाङ्कन, बनिश शाहको सम्पादन, ओम सुनारको संगीत तथा किरण ढकालको द्वन्द्व निर्देशन छ । बनिश शाह र सन्देश शाहको सम्पादन रहेको चलचित्र भदौ ७ गतेदेखि देशव्यापी प्रदर्शनमा आउँदैछ ।