बाजुराको गौमुलमा कुमारी बैंकको शाखा तोडफोड
बाजुरा । जिल्लाको गौमुल गाउँपालिकाको घटमुना बजारमा रहेको कुमारी बैंकको शाखा कार्यालयमा गएराति अज्ञात व्यक्तिले तोडफोड गरेको छ । राति २ बजेको एक व्यक्ति बैंकमा प्रवेश गरेको र कम्प्युटर चोरी गरेको शाखाका प्रबन्धक शीतल रावतले जानकारी दिए । एकजना व्यक्ति कार्यालयको मुल ढोका तोडफोड गरी बैंकमा प्रवेश गरेको र एउटा कम्प्युटर चोरी गरी लगेको सीसीटीभीमा देखिएको छ, प्रहरीले अनुसन्धान गरिरहेको छ । जिल्ला प्रहरी कार्यालय बाजुराले गएराति नै घटमुना बजारमा रहेका चारवटा पसलमा पनि चोरी भएको जनाएको छ ।
बैंकमा एकजना मात्र सुरक्षाकर्मी रहेको र उनको राति ८ बजेसम्म मात्रै ड्युटी रहेको जानकारी प्राप्त भएको छ । सुरक्षाकर्मी नभएको समयमा अज्ञात व्यक्तिले बैंकको मूल ढोका तोडफोड गरी बैंकभित्र प्रवेश गरेको देखिएको छ, अनुसन्धान सुरु भएको छ , जिल्ला प्रहरी कार्यालय बाजुराका निमित्त प्रहरी नायव उपरीक्षक रविन्द्रसिंह कार्कीको भने । गएराति नै गौमुल गाउँपालिका ६ मा रहेको सूर्योदय बहुउद्देश्यीय सहकारी संस्थाबाट ५० हजार चोरी भएको थियो ।