इसेवाको ‘मेरो डिजिटल देश’ अभियान अन्तर्गत घिमिरेले जितिन् काठमाडौंमा घर

काठमाण्डौं । डिजिटल रेमिटेन्स कम्पनी इसेवा मनी ट्रान्सफरले सञ्चालन गरेको ‘मेरो डिजिटल देश’ अभियान अन्तर्गत अन्जुला घिमिरेले काठमाडौंमा घर जित्न सफल भएकी छन्। मंसिर १२ गते इसेवा मनी ट्रान्सफर र इसेवाको आधिकारिक फेसबुक पेजसँगै कान्तिपुर टेलिभिजन मार्फत बम्पर उपहार स्वरुप घर जित्न सफल भाग्यशाली विजेताको घोषणा गरिएको थियो। प्रत्यक्ष प्रसारण मार्फत डिजिटल गोलाप्रथाको मध्यमबाट अन्जुला घिमिरेले महालक्ष्मी नगरपालिका ललितपुर वडा नं. ३, इमाडोलमा करिब ३ आना क्षेत्रफलमा बनेको साढे दुई तल्लाको घर जित्न सफल भए।

विजेता अन्जुला घिमिरेले रोमानियाबाट इसेवा मनी ट्रान्सफरमार्फत इसेवा वालेटमा रेमिटेन्स पठाएकी थिइन्। इसेवा मनी ट्रान्सफरले विदेशबाट आउने रेमिटेन्सको वैधानिकता प्रवर्द्धन गर्न र डिजिटल रेमिटेन्सलाई प्रोत्साहन गर्न ‘मेरो डिजिटल देश’ अभियान सार्वजनिक गरेको हो। यसै अन्तर्गत २०८० असोज १ देखि कात्तिक ३० गतेसम्म रेमिटेन्स पठाउने सहभागीमध्येबाट एक जनालाई बम्पर उपहार स्वरूप काठमाडौंमा घर दिने घोषणा गरेको थियो। कार्यक्रममा इसेवा मनी ट्रान्सफरका प्रमुख कार्यकारी अधिकृत अजेश कोइरालाले डिजिटल रेमिटेन्सको महत्त्व र यसले राष्ट्रिय अर्थतन्त्रमा पार्ने सकारात्मक प्रभावबारे चर्चा गरे। उनले भने, ‘मेरो डिजिटल देश’ अभियानले रेमिटेन्सलाई वैधानिक बनाउन महत्त्वपूर्ण भूमिका खेलेको छ।

देशलाई डिजिटल बनाउने हाम्रो यस अभियानप्रति योगदान पुर्‍याउने सबै नेपालीलाई धन्यवाद दिन चाहन्छु। आगामी दिनमा पनि रेमिटेन्सलाई डिजिटल र विश्वसनीय बनाउँदै थप प्रभावकारी सेवा प्रदान गर्नेछौं। इसेवाका प्रमुख कार्यकारी अधिकृत जगदीश खड्काले भने, डिजिटल रेमिटेन्सलाई प्रोत्साहन गर्दै विश्वभर रहेका नेपालीहरूलाई आफ्नो देश र परिवारसँग अझ नजिक बनाउन ‘मेरो डिजिटल देश’ अभियानले महत्वपूर्ण योगदान पुर्‍याएको छ। यस अभियान मार्फत, हामीले इसेवाबाट रेमिट्यान्स सेवा सहज, छिटो र विश्वसनीय बनाउँदै विदेशमा रहेका नेपालीहरूको मेहनतको कमाईलाई उनीहरूका प्रियजनहरूसम्म सुरक्षित रूपमा पुर्‍याउने प्रयास पनि गर्यौं। नेपाल राष्ट्र बैंकबाट इजाजतपत्र प्राप्त इसेवा मनी ट्रान्सफरले परम्परागत शैलीका साथै डिजिटल माध्यमबाट पनि विप्रेषण सेवा प्रदान गर्दै आइरहेको छ।