एनएमबि बैंकलाई युएन वुमन डब्लुईपी अवार्ड

काठमाडौं । एनएमबि बैंकलाई युएन वुमन एशिया प्यासिफिकले २०२४ डब्लुईपी अवार्ड प्रदान गरेको छ । बैंकले लैङ्गिक समानता र सामाजिक समावेशीकरण प्रवर्द्धन गरेकोमा सम्मान उक्त अवार्ड पाएको हो । युएन वुमन र युएन ग्लोबल कम्प्याक्ट बाट कार्यस्थल, बजार र समुदायहरूमा महिला सशक्तिकरण गर्दै लैङ्गिक समानता प्रवर्द्धनका लागि विश्वव्यापी मापदण्डहरू निर्धारण गरिएको छ । एनएमबि बैंकले ती विश्वव्यापी मापदण्डहरू कार्यान्वयन गर्नका लागि बैंकको तर्फबाट सक्दो प्रयास गरेको बताइएको छ ।

यस अवार्डले एनएमबि बैंकलाई विश्व बजारमा डब्लुईपीअन्तर्गत युएन वुमनद्वारा मान्यताप्राप्त पहिलो नेपाली संस्थाको रूपमा उभ्याएको छ । एसिया(प्यासिफिक देशका ६०० भन्दा बढी आवेदक संस्थाहरूमध्ये यो विशेष अवार्ड बैंकलाई प्रदान गरिएको बताइएको छ । यस अवार्डले एनएमबि बैंकलाई निरन्तर रूपमा समावेशी र दीगो विकास गर्ने आफ्नो उद्देश्य प्राप्त गर्दै अघि बढ्न प्रोत्साहन मिलेको पनि बैंकले जनाएको छ । एनएमबि बैंकले हाल देशभर २०१ शाखाहरू, १८७ एटीएमहरू र ११ एक्सटेन्सन काउन्टरहरूमार्फत उच्चस्तरीय सेवा प्रदान गर्दै आएको छ ।