ओली नेतृत्वको सरकारमा काम गर्न कहीँ न कहीँ समस्या छ- कांग्रेस मन्त्रीहरू
काठमाडौं । नेपाली कांग्रेसका सभापति शेरबहादुर देउवाले पार्टीबाट केपी शर्मा ओली नेतृत्वको सरकारमा सहभागी मन्त्रीहरूले सोचेअनुसार काम गर्न नसकेको ब्रिफिङ गरेका छन् ।
आज बिहीबार सभापति देउवा निवास बूढानीलकण्ठमा बैठकमा बोलाइएका मन्त्रीहरूले आफ्नो मन्त्रालयमा भइरहेका कामबारे ब्रिफिङ गरेका हुन् । बैठकपछि युवा तथा खेलकुदमन्त्री तेजुलाल चौधरीले मन्त्रीहरूबाट प्रत्येक मन्त्रालयको विस्तृत जानकारी गराउने काम भएको बताए । सभापति देउवाले उनीहरुसँग अहिलेसम्म के कस्ता काम भए र भविष्यमा कसरी काम गर्दै मन्त्रालयलाई प्रभावकारी बनाउने भन्ने विषय ब्रिफिङ गरेका थिए । मन्त्रीहरूले काम गर्ने जुन सोचका साथ अघि बढेपनि अझैपनि यसमा समस्या रहेको बताएका थिए ।
‘सिधै अप्ठ्यारो भएको जस्तो लाग्दैन । तर सोचे अनुसारको काममा जति चाँडो हुनुपर्ने जति अगाडि बढ्नुपर्ने त्यो कुरा कहीँ न कहिबाट समस्या भएको महसुस गरेका छन्’ मन्त्री चौधरीले भने, ‘तर, हाम्रा नेताहरू मिलेर त्यसलाई समाधान गर्ने उपायहरूबारे बताउनु भएको छ ।’
बिहीबार बिहान निजी निवास बुढानीलकण्ठमा बोलाएर सभापति देउवाले कांग्रेसबाट सरकारमा सहभागी भएका मन्त्रीहरूको कार्य प्रगति विवरणबारे जानकारी लिएका हुन सोहि क्रममा मन्त्रिहरुले ओली नेतृत्वको सरकारमा काम गर्न कहीँ न कहीँ समस्या रहेको बताएका हुन ।