संकटालाई सभापति कप फुटबलको उपाधि
काठमाडौं । टाइब्रेकरमा आयोजक लोकतान्त्रिक खेलकुद संघ वाग्मती प्रदेश (वाग्मती)लाई पराजित गर्दै ए डिभिजन लिग क्लब संकटाले सभापति कप फुटबल प्रतियोगिताको उपाधि जितेको छ । त्रिपुरेश्वरस्थित दशरथ रंगशालामा बिहीबार सम्पन्न फाइनलको निर्धारित ९० मिनेटको खेल गोलरहित बराबरीमा सकिएको थियो । योसँगै खेल टाइब्रेकरमा पुगेको हो । टाइब्रेकरमा संकटाले ४–३ ले बाजी मार्यो । उपाधिसँगै संकटाले २६ लाख रुपैयाँ हात पार्यो ।
वाग्मतीले भने १३ लाख रुपैयाँमा चित्त बुझायो । संकटाका राम थापा र रोशन पहारीको प्रहार विकेश कुथुले रोके । तर, लक्षु थापा, साम कार्लोस, दीप कार्की र सुनिल खड्काले गोल गरे । वाग्मतीका नवीन लामा, फोडे फोफना र सेन्जल एलेक्सले मात्रै गोल गर्न सके । कुलदीप कार्की र गौरव श्रेष्ठको प्रहार गोलरक्षक दीप कार्कीले रोके । रजत तिवारीको प्रहार माथिल्लो बारबाट बाहिरियो ।