वर्तमान सरकारलाई संविधानविपरीत कुनै पनि गलत काम गर्ने छुट छैन- मन्त्री अधिकारी

काभ्रेपलाञ्चोक। कृषि तथा पशुपक्षी विकासमन्त्री रामनाथ अधिकारीले वर्तमान सरकारले संविधानविपरीत कुनै पनि गलत काम गर्ने छुट नभएको बताएका छन् ।

उनले सरकार जनता केन्द्रित भएर काम गरिरहेकाले संविधानविपरीत गतिविधि नगर्ने विश्वास व्यक्त गरे । काभ्रेपलाञ्चोकको पनौतीमा सक्रिय महिला कृषि सहकारी संस्थाद्वारा स्थापित शीतभण्डारको उद्घाटन एवं स्थानीय कृषि उत्पादन प्रदर्शनी कार्यक्रममा मन्त्री अधिकारीले कृषि उत्पादनमा देखिएका कृषि बजारीकरण तथा प्रवर्द्धनलगायत किसानका समस्या योजनाबद्ध रूपमा समाधान गर्दै जाने बताए। उनले दुग्ध किसानका समस्या समाधान हुँदै गएको भन्दै अन्य क्षेत्रका सास्या पहिचान गरी समाधान गरिने प्रतिबद्धता जनाए । मन्त्री अधिकारीले कृषिमा विषादी न्यूनीकारण तथा रासायनिक मल व्यवस्थापनका लागि विशेष कार्यक्रम ल्याउने बताउँदै एकैपटक विषादी प्रयोग बन्द गर्न नमिल्ने भएकाले प्रयोग गर्नै परे सावधानी अपनाउन किसानलाई आग्रह गरे। माटोमा पनि रासायनिक मल प्रयोग घटाउँदै प्राङ्गारिक मलको प्रयोग बढाउँदै जान उनले आग्रह गरे।

आगामी वर्षका लागि मल व्यवस्थापनमा छुट्याएको रु २७ अर्बमध्ये रु २० देखि रु २२ अर्बसम्मको मल खरिद गरेर बाँकी रकमले किसानलाई घरमा प्राङ्गारिक, जैविक र जीवाणु मल उत्पादन गर्न लगाइने मन्त्रालयस्तरमा छलफल भइरहेको अधिकारीले बताए ।

सो अवसरमा पाँचखाल नगरपालिका प्रमुख महेश खरेलले खाद्यान्न, दूध तथा तरकारी उत्पादनका लागि प्रख्यात काभ्रेपलाञ्चोकमा किसानका लागि राहतका कार्यक्रम ल्याउन आग्रह गरे। संस्थाकी अध्यक्ष सुमित्रा बञ्जाराले स्थानीययस्तरमा शीतभण्डार व्यवस्थापनमा सरकारले आवश्य सहयोग र समन्वय गर्नुपर्नेमा जोड दिइन् ।