नीति तथा कार्यक्रम कर्मकाण्डी भएको टिप्पणी
काठमाडौं । राष्ट्रिय स्वतन्त्र पार्टी (रास्वपा) का सांसद डा. स्वर्णिम वाग्लेले नीति तथा कार्यक्रम कर्मकाण्डी भएको टिप्पणी गरेका छन् ।
मंगलबार प्रतिनिधिसभामा बोल्दै डा. वाग्लेले नीति तथा कार्यक्रम कर्मकाण्डी भएको टिप्पणी गरेका हुन् । उनले आफुले १२ वर्षदेखि चासो लिएर सुन्दै आएको नीति तथा कायर्क्रम कर्मकाण्डमै सीमित रहेको बताए । उनले यो सरकारलाई के कुराले सम्झिने भन्दै रवि लामिछानेलाई थुनेको, रविन्द्र मिश्रलाई थुनेको भनेर सम्झिने भन्दै प्रश्न गरे ।
सांसद डा. वाग्लेले निरन्तरतामा क्रमभंगता गर्न सक्दा मात्रै नीति तथा कार्यक्रमको उपादयता हुने बताउदै नीति तथा कार्यक्रम सुनिसकेपछि आफूले ‘थाकेको सरकारले जाँगर नल्याइ ल्याएको पूरानै कार्यसूची’ भनेर प्रतिक्रिया दिएको उल्लेख गरे । डा. वाग्लेले अहिले प्रचार गरिएका राम्रा काम खोतलेर हेर्दा खोक्रो भेटिएको बताए । उनले सरकारले ल्याएका राम्रा कामको आफ्नो पार्टीले समर्थन गर्ने भन्दै यसअघि सरकारले यस अघि ल्याएको एक अध्यादेशको समर्थन गरेको स्मरण गरेका थिए ।