स्वदेशमै सीपको उपयोग र लगानी गर्ने वातावरण सिर्जना गर्न जरुरी

काठमाडौँ । नेपाली काँग्रेसका सभापति शेरबहादुर देउवाले स्वदेशमै सीपको उपयोग र लगानी गर्ने वातावरण सिर्जना गर्न जरुरी भइसकेको बताएका छन्।

केन्द्रीय कार्यालय सानेपामा आयोजित एक कार्यक्रमलाई सम्बोधन गर्दै उनले यस्तो बताएका हुन्। सभापति देउवाले रोजगारी सिर्जना गरी युवा जनशक्ति स्वदेशमै रहने वातावरण मिलाउनुपर्ने बताए। उनले राष्ट्रिय नीतिमै रोजगारीलाई प्राथमिकता दिनुपर्ने कुरा आवश्यक रहेको उल्लेख गरे। उनले शिक्षा ऐन, निजामती ऐन ल्याउने कुरामा पनि नेपाली काँग्रेस दृढ रहेको बताए। सामाजिक सुरक्षा भत्ता वितरणमा समाजवादी अवधारणाबमोजिम नसक्नेलाई उपलब्ध गराउनुपर्ने देखिएको र योगदानमा आधारित सामाजिक सुरक्षा असङ्गठित क्षेत्रका श्रमजीवीहरूले पाउन सहज बनाउनुपर्ने बताए। त्यसका लागि कानुन संशोधन गरेर व्यवहारिक रूपमा कार्यान्वयन गर्न आवश्यक रहेको जानकारी दिए।

“शिक्षा ऐन, निजामती ऐन ल्याउने कुरामा पनि नेपाली काँग्रेस दृढ छ। सामाजिक सुरक्षा भत्ता वितरणमा समाजवादी अवधारणाबमोजिम नसक्नेलाई उपलब्ध गराउनुपर्ने देखिन्छ भने योगदानमा आधारित सामाजिक सुरक्षा असङ्गठित क्षेत्रका श्रमजीवीहरूले पाउन सहज होस्, भन्नका निमित्त कानुन संशोधन गरेर व्यवहारिक रूपमा कार्यान्वयन गर्नुपर्ने हुन्छ,” सभापति देउवाले भने, “अनौपचारिक क्षेत्रका श्रमिकका निम्ति श्रमिक पहिचान पञ्जीकरणका लागि स्थानीय तहमा व्यवस्था गर्न पार्टीले पहल गर्ने नै छ। रोजगारी सिर्जना गरी युवा जनशक्ति स्वदेशमै रहने र आफ्नै देशमा वृद्धि, सीप र लगानी गर्ने वातावरण सिर्जना गर्न जरुरी भइसकेको छ। राष्ट्रिय नीतिमै रोजगारीलाई प्राथमिकता दिनुपर्ने कुरा आवश्यक छ।”