संघीय निजामती सेवा विधेयकमा दुई वर्षको कुलिङ अफ पिरियड राख्ने सहमति

काठमाडौँ । राष्ट्रिय सभाको विधायन व्यवस्थापन समितिमा संघीय निजामती सेवा विधेयकमा दुई वर्षको कुलिङ अफ पिरियड राख्ने सहमति भएको छ । सिंहदरबारमा शनिबार बसेको समिति बैठकले सङ्घीय निजामती सेवा विधेयक, २०८० माथि दफावार छलफल गर्ने क्रममा दुई वर्षको कुलिङ अफ पिरियड राख्ने बिषयमा सहमति जुटाएको हो । यसअघि प्रतिनिधिसभाबाट उक्त विधेयक पारित गर्ने क्रममा कुलिङ अफ पिरियडमा छेडखानी गरेको पाइएको थियो । कुलिङ अफ पिरियड नरहने आशयसहितको विधेयक प्रतिनिधिसभाबाट पारित भएपछि राष्ट्रियसभाबाट त्यसलाई सच्चाउनुपर्ने आवाज समेत उठेको थियो । विधायन व्यवस्थापन समितिमा एमाले बाहेकका दलका सांसदले दुई वर्षको कुलिङ अफ पिरियड राख्नुपर्ने बताएका थिए भने एमाले सांसदहरुले कुलिङ अफ पिरियडको अवधि कम गर्ने बिषयमा धारणा राखेका थिए ।

छलफलपछि संघीय मामिला तथा सामान्य प्रशासनमन्त्री भगवती न्यौपानेले कुलिङ अफ पिरियडमा सरकारको कुनै छुट्टै अडान नरहेको बताइन् । दुई वर्षको कुलिङ अफ पिरियड राख्दा तलका कर्मचारीलाई कुनै अप्ठेरो नहुने र सवैलाई एउटै अर्थ लाग्ने गरि भाषा मिलाउनुपर्ने उल्लेख गरिन् । समिति सभापति तुलसा कुमारी दहालले निजामती सेवा विधेयकमा दुई वर्षको कुलिङ अफ पिरियड राख्ने सहमति भएको जानकारी दिइन् । यस बिषयमा भाषा मिलाएर अन्तिम प्रतिवेदन निर्माणका क्रममा छलफल हुने उनले बताइन् । निजामति विधेयकमाथि आइतबार पनि दफावार छलफल हुने सभापति दहालले बताइन् । राष्ट्रियसभा पारित भएको खण्डमा उक्त विधेयकलाई भाद्र १९ गते पारित गर्ने प्रतिनिधिसभाको तयारी छ ।