मेची बहुउद्देश्यीय सहकारीद्वारा सहकारी अभियन्ता पुरस्कार महासंघका उपाध्यक्ष बस्नेतलाई प्रदान

झापामा रहेको मेची बहुउद्देश्यीय सहकारी संस्थाले यो वर्षको स्व. गणेशप्रसाद बस्नेत स्मृती सहकारी अभियन्ता पुरस्कार, राष्ट्रिय सहकारी महासंघका उपाध्यक्ष डिबी बस्नेतलाई प्रदान गरेको छ । संस्थाको २९ औ वार्षिकोत्सव तथा ३१औ साधारणसभाको माइन्युट प्रमाणिकरण सभामा उक्त पुरस्कार तथा सम्मान प्रदान गरेको हो । संस्थाका अध्यक्ष नारायणप्रसाद भट्टराईको अध्यक्षता तथा प्रदेशका भौतिक पुर्वाधार तथा यातायात मन्त्री देवेन्द्र दाहालको प्रमुख आतिथ्यता सम्मान गरिएको थियो । संस्थाले उपाध्यक्ष बस्नेतलाई ३४ हजार ६६६ रुपैंयाँ सहित सम्मान गरेको छ । संस्थाले संस्थाका पूर्व अध्यक्ष स्व। बस्नेतको नाममा हरेक वर्ष पुरस्कार प्रदान गर्दैआएको छ। यसैगरी संस्थाले यसै अवसरमा स्व गणेशप्रसाद बस्नेत पत्रकारिता पुरस्कार स्वादिन सम्वाद साप्ताहिकका सम्पादक माधव बिद्रोही र मेची पत्रकारिता पुरस्कार पूर्वज्योति साप्ताहिक उर्लाबारीका सम्पादक प्रकाशक जगन्नाथ भट्टराई तथा मेची सहकारी सञ्चार गृह पुरस्कार बिर्तामोडको रेडियो भिजनलाई प्रदान गरेको छ ।

यसैगरी संस्थाले गत चैत्रमा आयोजना गरेको अन्तर सेवा कार्यालयस्तरीय फुटसल प्रतियोगिताको पुरस्कार समेत बितरण गरेको छ । प्रतियोगितामा कन्काइ र शिवसताक्षी सेवा कार्यालयका संयुक्त टिम प्रथमलाई १० हजार, मिक्लाजुङ सेवा कार्यालय द्वितीयलाई ५ हजार त्यसैगरी धेरै गोल गर्ने कन्काइ सेवा कार्यालयका कर्मचारी विशाल टुडु र उत्कृष्ट मिडफिल्डर आदित्य थापालाई एक एक हजार नगद प्रदान गरेको थियो । यसै अवसरमा संस्थाको विभिन्न विभागमा कार्यरत कर्मचारीलाई समेत सम्मान तथा पुरस्कृत गरिएको थियो । बार्षिकोत्सवको अवसरमा संस्थाले रक्तदान कार्यक्रम समेत गरेको थियो । संस्थाले सेवाकेन्द्र स्तरिय एकाइगत बार्षिक साधारण सभा गरी माइन्यूट प्रमाणिकरण सभाका साथै निर्वाचन समेत सम्पन्न गरेको छ । सभाले ९ जनाको संचालक समिति सर्वसम्मत चयन गरेको थियो ।