पूर्वराजा शाहको असन्तुष्टिपछि राप्रपा शीर्ष नेताको बोल्ती बन्द
काठमाडौं । गत चैत ८ गते पूर्वराजा ज्ञानेन्द्र शाह परिवारसहित हिमालय टी गार्डेनमा रहेको आफ्नो दरबारमा थिए । टी गार्डेन पूर्वराजाकै स्वामित्वमा रहेको छ । जसले विगत १८ वर्षदेखि सरकारलाई राजस्व तिरिरहेको छैन । बरु कृषि अनुदान पाउँ भन्दै कर छुटका लागि निवेदन दिएको छ ।
पूर्वराजा झन्डै एक महिनासम्म झापातिरै थिए । राप्रपाले संसदमा खुलेआम संवैधानिक राजतन्त्र चाहियो भन्दै भाषण गर्न थालेको थियो । त्यहीबीचमा पूर्वराजा शाहले राप्रपाका शीर्ष नेतालाई भेट्न बोलाए । चुनावताका गरेको सहयोगलाई भुलेर राप्रपा एकाएक एमाले–माओवादी गठबन्धनको सरकारमा गएपछि पूर्वराजा शाह निकै असन्तुष्ट थिए ।
पूर्वराजाले नै बोलाएपछि अध्यक्ष राजेन्द्र लिङ्देन, वरिष्ठ उपाध्यक्ष रवीन्द्र मिश्र, महामन्त्री धवलशमशेर राणा र डा.प्रकाशचन्द्र लोहनी झापा पुगे । ‘तपाईंहरू एमाले–माओवादी सम्मिलित सरकारमा गएकोमा कोही पनि खुसी छैनन्, नट इभन इण्डिया’ पूर्वराजा शाहले यसो भन्दा सबै नाजवाफ भए । रास्वपालगायतको समर्थनमा पहिलोपल्ट पुष्पकमल दाहाल प्रचण्डले बनाएको सरकारलाई समर्थन गर्दै राप्रपा त्यसैमा सहभागी भएपछि पूर्वराजाले यस्तो असन्तुष्टि पोखेका हुन् ।
पूर्वराजाकै पक्षमा माहोल बनाइरहेका बेला उनले राप्रपाका शीर्ष नेतालाई हप्काएपछि यो विषयले तरंग सिर्जना गरेको छ । प्रचण्ड नेतृत्वको सरकारमा राप्रपा ४२ दिन बसेको थियो । सरकारमा राप्रपा अध्यक्ष लिङ्देन, उपाध्यक्ष विक्रम पाण्डे, ध्रुवबहादुर प्रधान र दीपक सिंह गएका थिए । यो भेटघाटपछि राप्रपा निर्देशन समितिको एक बैठकमा उद्धव पौडेलले पूर्वराजालाई उनलाई हामीले किन बोक्नुप¥यो भन्दै बवाल गरेको बताइन्छ ।
पूर्वराजाको त्यो असन्तुष्टिका कारण राप्रपाभित्र तनाव सिर्जना हुँदै गइरहेको बताइन्छ । तर पनि राप्रपाले पूर्वराजालाई बोक्न छाडेको छैन । उसले नेपालगन्जमा पूर्वराजाको नागरिक अभिनन्दन गरेको छ । जुम्लामा तय भएको नागरिक अभिनन्दन कार्यक्रम रोकिएको छ ।