मौद्रिक नीति भोलि नै सार्वजनिक गर्ने तयारी

काठमाडौं । आगामी आर्थिक वर्ष २०८१।८२ को मौद्रिक नीति पास गर्न नेपाल राष्ट्र बैंक सञ्चालक समितिको बैठक शुक्रबार (भोलि) बिहान बस्ने भएको छ । राष्ट्र बैंक स्रोतका अनुसार शुक्रबार नै राष्ट्र बैंकले मौद्रिक नीति सार्वजनिक गर्ने तयारी गरेको छ । तर, बोर्ड सदस्यहरूको राय बाझिएमा वा आफ्ना सुझाव राख्न केही समय मागेमा मौद्रिक नीति सार्वजनिक गर्ने मिति अर्को हप्तासम्म सर्न सक्ने स्रोतको भनाइ छ । राष्ट्र बैंकले त भोलि नै मौद्रिक नीति सार्वजनिक गर्ने गरी काम गरिरहेको छ ।

तर, कुनै सदस्यले केही राय राख्न चाहनुभयो भने अर्को हप्ताका लागि समय तोकिने छ । नेपाल राष्ट्र बैंकको सञ्चालक समितिको अध्यक्ष गभर्नर महाप्रसाद अधिकारी छन् । त्यस्तै, सञ्चालक समितिको सदस्यमा अर्थसचिव मधुकुमार मरासिनी, डेपुटी गभर्नरहरू निलम ढुंगाना तिम्सिना र बमबहादुर मिश्र, पूर्व डेपुटी गभर्नर चिन्तामणि सिवाकोटी, डा। शंकरप्रसाद आचार्य र रविन्द्रप्रसाद पाण्डे छन् ।