उपत्यकामा सडक भासिन छाडेन, इमाडोलमा पनि सडक भासियो 

काठमाडौँ । ललितपुरको इमाडोलमा सडक भासिएको छ । 

महालक्ष्मी नगरपालिका–३, इमाडोलको बोझे पोखरी जाने सडक भासिएको हो । जिल्ला प्रहरी परिसर ललितपुरका एसपी नरेशराज सुवेदीले सडक करिब तीन मिटर भासिएको जानकारी दिए । सडक भासिएपछि सवारीसाधनलाई डाइभर्ट गरिएको छ । केही दिन अघि काठमाडौँस्थित टुकुचा खोलामाथि बनाइएको सडक पनि भासिएको थियो । कमलादीस्थित उक्त सडक भासिँदा सवारी आवागमन ठप्प भएको थियो।

काठमाडौँ प्लाजादेखि उत्तरतर्फ दरबारमार्ग स्थित महेन्द्र सालिकबाट कमलादीको कृष्ण पाउरोटी चोक निस्किने एकतर्फी सडक भासिएको हो। उक्त सडकमा अहिले सवारी आवतजावत बन्द गरिएको छ ।