जनकपुरधाममा जनकपुर बोल्ट्सको विजयउत्सव
काठमाडौँ । नेपाल प्रिमियर लिग (एनपीएल)को पहिलो संस्करणको च्याम्पियन टिम जनकपुर बोल्ट्सले जनकपुरधाममा आज विजयउत्सव जुलुस निकालेको छ ।
विजयी उत्सवका लागि जनकपुर बोल्टस्का खेलाडीहरू बिहीबार जनकपुरधाम आएका थिए । उनीहरूले आज जनकपुरधामस्थित रामजानकी रंगशालाबाट ट्रफीसहित विजयी जुलुस निकालेका हुन् । जुलुसमा ठूलो संख्यामा समर्थक सहभागी छन् । जानकी मन्दिरमा पूजापाठ पश्चात् जनकपुरधामको विभिन्न भागमा परिक्रमा गर्ने बताइएको छ ।
शनिवार महोत्तरी, सर्लाही र रौतहट, आइतबार बारा र पर्सा तथा सोमवार सिरहा र सप्तरी गरी मधेसका आठै जिल्लामा विजयी जुलुस निकाल्ने जनकपुर बोल्ट्सले जनाएको छ ।