चलचित्र ‘लाज शरणम्’ को नयाँ पोस्टर सार्वजनिक
काठमाडौँ । चलचित्र ‘लाज शरणम्’को नयाँ पोस्टर सार्वजनिक भएको छ । पोस्टरले फिल्मका नयाँ क्यारेक्टरलाई रिभिल गर्दै दर्शकको ध्यान आकर्षित गरेको छ ।
पोस्टरमा अभिनेता सीताराम कट्टेल (धुर्मुस), कलाकारहरु विजय बराल, महेश त्रिपाठी, अर्पण थापा, कमलमणी नेपाल लगायत प्रस्तुत छन् । नेताको भूमिकामा रहेका सितारामलाई दोरा–सुरुवाल र ज्वारीकोटमा देखाइएको छ । पोस्टरमा अभिनेता सीताराम कट्टेल पूर्वमन्त्री तथा कांग्रेस नेता मोहम्मद आफताव आलमको अवतारमा देखिएका छन्। उनले हात उठाएर अभिवादन गरिरहेका छन् । गेटअप र ड्रेसअप हेर्दा उनी ठ्याक्कै आलमकै भेषमा छन् । यसका अलावा पोस्टरमा कफिन बोकेका स्थानीयहरूको दृश्य समेत देखिन्छ । यसले फिल्म राजनीतिक विषयवस्तुमा आधारित भएको यस पोस्टरबाट बुझ्न सकिन्छ ।
‘लाज शरणम्’ हास्य टेलिश्रृंखला ‘सक्किगोनि’ टिमले निर्माण गरेको चलचित्र हो । यसमा अर्जुन घिमिरे(पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी)लगायतका कलाकारले अभिनय गरेका छन् । चलचित्रको निर्देशन कुमार कट्टेल ‘जिग्री ब्रो’ले गरेका छन्।
जेपिटी क्रियसनको ब्यानरमा निर्माण भएको सिनेमामा नवीन श्रेष्ठ निर्माता, राम नरेश शाह र सृजना खड्का सह–निर्माताको रूपमा रहेका छन् । सिनेमालाई सुदीप बरालले छायांकन गरेका हुन् । यो चलचित्र यही फागुन १४ गते महाशिवरात्रिको अवसरमा प्रदर्शन हुने भएको छ।