डकुड्रामा ‘मौन’ को फस्टलुक पोस्टर सार्वजनिक
काठमाडौँ । रिसर्चमा आधारित डकुड्रामा ‘मौन’ को फस्टलुक पोस्टर सार्वजनिक गरिएको छ । सेलिब्रेटी टाइम्सको ब्यानरमा निर्माण गरिएको यस फिल्मलाई विभिन्न फेस्टिभल, च्यारिटी शो तथा विशेष प्रदर्शनमार्फत दर्शकमाझ पुर्याउने निर्माण युनिटले जानकारी दियो । पोस्टरमा फिल्मकी मुख्य पात्र प्रार्थना पाठकलाई फिचर्ड गरिएको छ । चर्चित कलाकारहरू सरोज खनाल र हिउँवाला गौतम लगायत भने लुकाइएको छ । पोस्टरसँगै फिल्मका मुख्य टिम सदस्यहरू पनि सार्वजनिक गरियो । फिल्मका निर्माता निर्देशक रामजी ज्ञवाली हुन् । ‘मौन’ कुनै व्यावसायिक प्रोजेक्ट नभएर एउटा वास्तविक जीवनसँग जोडिएको कथा, जसले समाजलाई सचेत गराउने निर्देशक ज्ञवालीले बताए । ज्ञवाली ‘मौन’ लाई १ सय ६८ मिलियनभन्दा बढी व्यक्तिहरूको यथार्थ कथा समेत भन्छन् ।रामशरण पाठकको कथा रहेको फिल्ममा छायाङ्कन सङ्कल्प भुजेलको रहेको छ । सरोज खनाल, हिउँवाला गौतम, नवकलाकारहरू प्रार्थना पाठक, ओजस्वी विक्रम विष्ट, दिवस नाथ लगायतका कलाकार अभिनय रहेको फिल्मको सहायक निर्माता हरि क्षेत्री ‘भूपेन्द्र’ हुन् ।