प्रचण्डको अभिव्यक्तिमा एमालेले भन्यो- राजनीतिको यात्रामा भेट नहुने गरी अभिव्यक्ति दिए
काठमाडौं । नेकपा एमालेले नेकपा माओवादी केन्द्रका अध्यक्ष पुष्पकमल दाहाल प्रचण्डले राजनीतिको कुनै पनि यात्रामा भेट कहिले पनि हुन नसक्ने गरी अभिव्यक्ति दिएको भन्दै आपत्ति जनाएको छ ।
सोमबार सभामुख देवराज घिमिरेले राखेको ठूला दलका प्रमुख सचेतकहरूसँगको छलफल पछि सञ्चारकर्मीहरुसँग कुराकानी गर्दै एमालेका प्रमुख सचेतक महेश बर्तौँलाले प्रचण्ड मूलुकलाई शान्तिपूर्ण ढंगबाट अगाडि बढोस् भन्ने चाहाना गर्ने व्यक्तिभित्र पनि पर्नुहुन्न कि भन्ने आशंका पैदा भएको बताए । उनले भने ,‘उहाँ आफैंमा पनि मूलुकलाई एउटा शान्तिपूर्ण ढंगबाट अगाडि बढोस् भन्ने चाहाना गर्ने व्यक्तिभित्र पनि पर्नुहुन्न कि भन्ने अब आशंका लागेको छ । विगतमा उहाँको व्यवहारले त देखाएको थियो । राजनीतिको कुनै पनि यात्रामा भेट कहिले पनि हुन नसक्नेगरी जसरी उहाँले भित्तामा पुगेर अभिव्यक्तिहरु दिइरहनु भएको छ । एकदम नाङ्गो शैलीमा यो कुरा सुहाएको छैन ’ उनले भने ।
त्यस्तै उनले प्रचण्डले तेस्रो दलको रुपमा रहँदा पनि कहिले एमालेको र कहिले कांग्रेसको काँध चडेर १८ महिना देशको नेतृत्व गर्ने कुरामा पाएको सहयोग विर्सेर सरकारप्रति हिलो छ्याप्ने भ्रम सृजना गर्ने गरी अभिव्यक्ति दिने गरेको बताए । उनले सरकार ढलेपनि एमाले वा कांग्रेस सामेल नभई यो देशमा सरकार बन्न नसक्ने समेत दाबी गरे ।
उनले भने, ‘अराजकता र अस्थिरता चाहानेले यस्तै कुराको खेतिपाति गर्छन् । उहाँले त्यही गरिरहनु भएको छ । कल्पनामा यो सरकार ढलेपनि उहाँले कुन सरकार बनाउनु हुन्छ ? एमाले वा कांग्रेस सामेल नभई यो देशमा सरकार बन्दैन् । उहाँलाई यो कुरा पनि थाहा छ कि यो सरकार कुनै पनि हिसाबले कम्जोर धरातलमा पुगेको सरकार होईन् ।’