गाजा नियन्त्रण लिने निर्णय गलत- बेलायत प्रधानमन्त्री
काठमाडौँ । बेलायतका प्रधानमन्त्री केयर स्टारमरले इजरायलको सुरक्षा मन्त्रिपरिषद्ले गाजाको नियन्त्रण लिने निर्णय गलत भएको बताएका छन् ।
स्टारमरले इजरायलको निर्णयलाई गलत भन्दै यसलाई पुनर्विचार गर्न अपील गरेका छन् । स्टारमरले भनेका छन्- ‘इजरायली सरकारको गाजामा आक्रमण बढाउने निर्णय गलत छ । हामी उनीहरूलाई तुरुन्तै पुनर्विचार गर्न अपील गर्दछौं । गाजामा मानवीय संकट दिन प्रतिदिन बढ्दै गइरहेको छ । हमासद्वारा बन्धक बनाइएका मानिसहरूलाई भयानक र अमानवीय अवस्थामा राखिएको छ । हामीलाई अब युद्धविरामको आवश्यकता छ ।’
यसअघि, इजरायलको सुरक्षा मन्त्रिपरिषद्ले शुक्रबार बिहान भएको बैठकमा इजरायली प्रधानमन्त्री बेन्जामिन नेतान्याहूको गाजाको नियन्त्रण लिने योजनालाई अनुमोदन गरेको थियो ।