‘बुद्ध भगवान र पशुपतिनाथसँग प्राथना गर्छु दुवै उपप्रधानमन्त्रीले ८४ मा नजितुन्’
काठमाडौँ । नेपाली काँग्रेसका सांसद पूर्ण बहादुर तामाङ (कान्छाराम) ले सरकारका दुई उपप्रधानमन्त्री २०८४ को चुनावमा पराजित हुन बुद्ध भगवान र पशुपतिनाथसँग प्राथना गर्ने बताएका छन् ।
बजेटमाथिको छलफलमा बोल्दै तामाङले सहरी विकास मन्त्रालय र अर्थ मन्त्रालयको बजेटको आलोचना गर्दै २०८४ पछि दुवै उपप्रधानमन्त्री यो संसदमा नआउन भन्दै प्राथना गर्ने बताए । उनले भने- ‘मैले सहरी विकास मन्त्रालयको बजेट लिएको छु । साथीहरुले यो किताब च्यात्ने काम गरे । मैले जनताको कर तिरेको पैसाले बनाएको किताब हो, म च्यात्दिन, बुद्ध भगवान र पशुपतिनाथलाई सम्झेर, यो किताबलाई ढोगेर २०८४ को चुनावमा यो दुवै उपप्रधानमन्त्री यो संसदमा नआओस् भन्ने प्राथना गर्छु।’
तामाङले अर्थमन्त्री र सहरी विकासमन्त्रीले बजेट साटासाट गरेको आरोप लगाउदै काठमाडौँ र रुपन्देहीमा बजेट साटासाट गरेको बताए । उनले आफ्नै पार्टीका नेता प्रकाशमान सिंहलाई प्रधानमन्त्री बन्ने मान्छेले काठमाडौँमा बजेट ल्याएर अब राजनीतिमा के गर्नुहुन्छ ? भन्दै प्रश्न गरेका छन् ।