बानियाँले प्रदेश प्रमुखलाई गराए दल नेता भएको जानकारी

काठमाण्डौं । नेपाली कांग्रेस बागमती प्रदेश सभाको संसदीय दलको नेता इन्द्रबहादुर बानियाँले आफू दलको नेता भएको जानकारी प्रदेश प्रमुख दीपकप्रसाद देवकोटालाई जानकारी गराएका छन् । उनले बुधबार प्रदेश प्रमुख कार्यालय हेटौँडामा पुगेर आफू दल नेता चुनिएको पत्र सहित जानकारी प्रदेश प्रमुख देवकोटालाई बुझाएका हुन् ।नेता बानियाँले बुधबार सम्पन्न निर्वाचनमा कुल ३५ मतमध्ये २२ मत प्राप्त गर्दै संसदीय दलको नेता पदमा निर्वाचित भएका थिए । कांग्रेस संसदीय दलको विधान २०७९ को धारा ५ को उपधारा (२) बमोजिम निर्वाचन गरिएको उक्त प्रक्रियामा बानियाँले कुल सदस्य सङ्ख्याको ५० प्रतिशतभन्दा बढी मत प्राप्त गरेपछि उनी दलको नेता पदमा विजयी भएका थिए । मुख्यमन्त्री बहादुर सिंह लामाले सरकार विस्तारको तयारी गरेसँगै नेता बानियाँले प्रदेश प्रमुख देवकोटालाई पत्र पठाएका हुन् । कांग्रेस संसदीय अभ्यास अनुसार दल नेता नै मुख्यमन्त्री हुने प्रक्रिया रहेकाले नेता बानियाँले प्रदेश प्रमुख देवकोटालाई भेटेका हुन् । मुख्यमन्त्री लामाले आफूले गठबन्धनको सरकारको नेतृत्व गरेकाले तत्काल राजीनामा दिन नपर्ने बताउँदै बिहीबार दिउँसो १ बजे ३ जना मन्त्रीको शपथ ग्रहण कार्यक्रम राखेका छन् ।