शिवम सिमेन्टको नाफा २०५ प्रतिशतले बढ्यो

काठमाण्डौं । शिवम सिमेन्ट लिमिटेडले आर्थिक वर्ष २०८१।८२ को चौथो त्रैमासमा उल्लेखनीय नाफा वृद्धि गर्दै ७९ करोड ४१ लाख रुपैयाँ खुद नाफा आर्जन गरेको छ। यो अघिल्लो वर्षको सोही अवधिको २५ करोड ९६ लाख रुपैयाँ नाफाको तुलनामा २०५.८५ प्रतिशतले बढी हो। नाफामा भएको तीव्र वृद्धिको बाबजुद कम्पनीको सञ्चालन आम्दानी भने ०.७८ प्रतिशत मात्र बढेर ७ अर्ब ७६ करोड रुपैयाँमा सीमित भएको छ। प्रतिशेयर आम्दानी अघिल्लो वर्षको ५ रुपैयाँ १६ पैसाबाट बढेर १४ रुपैयाँ ५५ पैसा पुगेको छ। कम्पनीको चुक्ता पुँजी ८.५५ प्रतिशतले बढेर ५ अर्ब ४५ करोड रुपैयाँ पुगेको छ भने सञ्चित मुनाफा १०.४६ प्रतिशतले बढेर ३ अर्ब ८७ करोड रुपैयाँमा पुगेको छ।

स्थायी सम्पत्ति ७.५५ प्रतिशतले बढ्दै ३ अर्ब ८८ करोड रुपैयाँमा पुगेको छ भने कुल लगानी ३।७१ प्रतिशतले बढेर ४ अर्ब ७५ करोड रुपैयाँमा पुगेको छ। यस अवधिमा व्यापारिक देय २७.२२ प्रतिशतले घटेर ८१ करोड ९९ लाख रुपैयाँमा झरेको छ, जसले असुली प्रक्रियामा सुधार देखाउँछ। यद्यपि, अन्य आम्दानी ३०.७८ प्रतिशतले घट्दै १३ करोड ९४ लाख रुपैयाँमा झरेको छ। कुल खर्च पनि १.६६ प्रतिशतले घटेर ९४ करोड ६ लाख रुपैयाँमा सीमित भएको छ। प्रतिशेयर खुद सम्पत्ति मूल्य १८८ रुपैयाँ ८४ पैसाबाट सामान्य घट्दै १८८ रुपैयाँ ५७ पैसामा पुगेको छ। त्रैमासको अन्त्यमा कम्पनीको सेयर मूल्य ५३५ रुपैयाँ ४ पैसा कायम रह्यो, जसअनुसार मूल्य–आर्जन अनुपात ३६.७७ गुणा रहेको छ।