राष्ट्रपति ट्रम्पले खोसे पूर्वउपराष्ट्रपति कमला ह्यारिसको सिक्रेट सर्भिस सुरक्षा
काठमाडौं । अमेरिकी राष्ट्रपति डोनाल्ड ट्रम्पले पूर्वउपराष्ट्रपति कमला ह्यारिसको लागि प्रदान गरिएको सिक्रेट सर्भिस सुरक्षा रद्द गरेका छन् । अमेरिकी कानुनअनुसार कुनै पनि अमेरिकी पूर्वउपराष्ट्रपतिहरूले पद छोडेपछि ६ महिनासम्म सिक्रेट सर्भिसको सुरक्षा प्राप्त गर्छन् । अघिल्ला राष्ट्रपति जो बाइडेनले आफ्नो कार्यकालको अन्त्यमा यो अवधिलाई एक वर्षसम्म विस्तार गर्ने आदेश दिएका थिए । तर, ट्रम्पले एक मेमोर्यान्डम जारी गर्दै यो व्यवस्थालाई रद्द गरेका छन् । यो आदेशसँगै कमला ह्यारिसको अतिरिक्त सुरक्षा १ सेप्टेम्बर २०२५ देखि समाप्त हुनेछ । यो निर्णय ह्वाइट हाउसका एक उच्च अधिकारीले पुष्टि गरेका छन् । कमला ह्यारिसले पद छोडेको सात महिना र केही दिनमात्र भएको छ ।
अमेरिकी पूर्वउपराष्ट्रपतिहरूलाई पद छोडेपछि सिक्रेट सर्भिसको सुरक्षा दिने कानुन सन् २००८ मा पारित भएको थियो । यो निर्णय यस्तो समयमा आएको छ जब ह्यारिस आफ्नो पुस्तक ‘१०७ डेज’को प्रचार अभियानका लागि देशभर भ्रमण गर्ने तयारीमा छिन् । अब ह्यारिसको र लस एन्जलसस्थित उनको घर तथा सम्पत्तिको सुरक्षाका लागि खटाइएका एजेन्टहरू उपस्थित हुने छैनन् । यससँगै सम्भावित खतराहरूको पहिचान र रोकथामका लागि गरिने गुप्तचर निगरानी पनि बन्द हुनेछ । गत राष्ट्रपति निर्वाचनमा कमला ह्यारिसले ट्रम्पकोविरुद्ध डेमोक्रेटिक उमेदवारको रूपमा प्रतिस्पर्धा गरेकी थिइन् ।