‘भ्यालेन्टाइन डे’मा कवि,गीतकार बसन्तले एकल कविता वाचन गर्ने

काठमाडौं । यस वर्षको ‘भ्यालेन्टाइन डे’ प्रणय दिवसको अवसर पारेर कवि,गीतकार बसन्त चौधरीले एकल कविता वाचन गर्ने भएका छन् ।
सोही अवसरमा कवि चौधरीका दुई कृति ‘मेरा गीत’ गीतहरूको संग्रह तथा ‘जीवनमन्त्र–२’ सुक्ति संग्रहसमेत लोकार्पित गरिने जारी प्रेस विज्ञप्तिमा जनाइएको छ । कवितासँग वसन्त’ शीर्षककासाथ एकल कविता वाचनको थिम ‘लभ इज इन दि एयर’ राखिएको छ । आउँदो फागुन २ गते अपरान्ह राजधानीस्थित मण्डला थिएटरमा प्रेमसँग सम्बन्धित कविताहरू बसन्तले वाचन गर्ने जनाइएको छ । सो विशेष कार्यक्रममा कवि चौधरीले एकदर्जनभन्दा बढी प्रेमिल कविताहरू प्रस्तुत गर्नेछन् । कवि तथा गीतकार चौधरी नेपाली साहित्यमा प्रेमसँग सम्बन्धित कविता तथा रचनाका लागि चर्चित छन् । केही वर्षअघि उनले नेपाली साहित्यको उन्नयनका लागि विश्व काव्ययात्राको आयोजना गर्दै विभिन्न देशहरूमा पुगेर प्रेमिल कविता प्रस्तुत गरेका थिए । कवि चौधरीका ‘मेघा’देखि ‘तिमीबिनाको म’सम्म एकदर्जन कृतिहरू प्रकाशित छन् ।