एकीकृत समाजवादीमा वामदेव गौतम वरिष्ठ नेता, तेस्रो वरियतामा
काठमाडौं । नेकपा एकीकृत समाजवादीले वामदेव गौतमलाई वरिष्ठ नेता बनाउदै तेस्रो वरियतामा राखेको छ ।
शुक्रबार पार्टी केन्द्रीय कार्यालय आलोकनगरमा गौतमलाई स्वागत गर्दै एकता अभियानबाट आएका नेताहरुको जिम्मेवारी तोकिएको हो । एकीकृत समाजवादीका एक नेताका अनुसार गौतमलाई वरिष्ठ नेताको पद दिइएको छ भने उनलाई अध्यक्ष माधव कुमार नेपाल र सम्मानित नेता झलनाथ खनालपछिको वरियता दिइएको छ ।
त्यस्तै, एकता अभियानबाट आएका नेताहरु डिबी कार्की, लुलसी थापा र लोकनाथ धमलालाई पोलिटब्यूरो सदस्यको जिम्मेवारी दिइएको भने भगवती विष्ट, दुर्गादत्त भण्डारी, राधेश्याम गुप्ता, इमानसिंह भारती, रवीन्द्र बम, तोफा यादव, विद्या प्रसाद शर्मा, राम प्रसाद अधिकारी र मोहम्मद शेर बागवानलाई केन्द्रीय सदस्य बनाइएको छ ।
वामदेव गौतम यहि साउन २ गते एकीकृत समाजवादीमा समाहित भएका थिए ।