सदन खुलाउन प्रधानमन्त्री प्रचण्डले एमाले अध्यक्ष ओलीसँग छलफल गर्ने
काठमाडौं । प्रधानमन्त्री पुष्पकमल दाहाल प्रचण्ड र सभामुख देवराज घिमिरेबीचको छलफल सकिएको छ । बालुवाटारमा भएको छलफलमा कसरी अवरुद्ध सदन खुलाउने भन्ने विषय केन्द्रित थियो ।
प्रधानमन्त्री प्रचण्डले आफूले अवरुद्ध सदन खुलाउन एमाले अध्यक्ष केपी ओलीसँग कुराकानी गर्ने बताएका थिए । ‘म पनि सदन खुलाउन भूमिका खेल्छु । तपाईं पनि लाग्नुहोस् । छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु,’ प्रचण्डको भनाइ थियो ।
सभामुख घिमिरेल सदन नचल्नु राम्रो नभएको बताएका थिए । ‘सदन नचल्नु राम्रो भएन । माननीयहरुले बोल्न समय माग्नुभएको छ । प्राकृतिक विपत्ति लगायतका धेरै विषयमा माननीयहरुले बोल्न पाइनँ भन्नुहुन्छ । दलिय सहमतिबिना सदन अगाडि बढ्न सक्ने स्थिति छैन । आम जनताले पनि सदन अवरोधलाई राम्रो मानेका छैनन् ।
कम्तिमा सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् । समितिको नेतृत्व चयन हुन सकेको छैन । संसदमा कानून निर्माण भएनन् भन्ने गुनासो छ । सभामुखको रुपमा मैले सहमतिका लागि जिम्मेवारीपूर्वक पहल गरेको छु । तर, परिणाममा निस्किन सकेन । शीर्ष नेताहरु नै घण्टौं बस्दा पनि सहमति भएन,’ उनले प्रधानमन्त्रीसँग भने ।
हकङ्कबाट आएको ‘ब्रेक शु’सहित १५५ किलो सुन प्रकरणमा उच्चस्तरीय छानबिन समिति गठनको माग गर्दै एमालेले सदन अवरुद्ध गर्दै आएको छ ।