प्रधानमन्त्री प्रचण्डलाई एमालेले ज्ञापन पत्र बुझाउँदै

काठमाण्डौं । प्रमुख प्रतिपक्षी दल नेकपा (एमाले)ले मंगलबार प्रधानमन्त्री पुष्पकमल दाहाल ‘प्रचण्ड’लाई आज बिहान ९ बजे ज्ञापन पत्र बुझाउँदै छ। प्रधानमन्त्री प्रचण्डलाई ज्ञापन पत्र बुझाउन लागिएको पार्टीका उपमहासचिव प्रदीप ज्ञवालीले जानकारी दिए। एमालेले मंसिर १४ गतेदेखि पुस १ गतेसम्म पश्चिमको झुलाघाटदेखि पूर्वको चिवाभञ्ज्याङसम्म संकल्प यात्रा गरेको थियो। मध्यपहाडी लोकमार्ग केन्द्रित झन्डै दुई हजार किलोमिटर यात्राका क्रममा आएका गुनासा, सुझावहरूलाई वर्गीकरण गरेर ज्ञापन पत्र बुझाउन लागिएको ज्ञवालीले बताए। ‘संकल्प यात्राका क्रममा आएका जन गुनासाहरूलाई वर्गीकरण गरेर, कुन–कुन निकायसँग सम्बन्धित छन् भनेर छुट्टयाएका छौं।

ती गुनासो–समस्साहरू सम्बोधनका लागि प्रधानमन्त्रीलाई दिन लागेका हौं। एमालेले माघ मसान्तदेखि नेकपा (माओवादी केन्द्र) नेतृत्वको गठबन्धन सरकारविरूद्ध आन्दोलनको तयारी गरिरहेको छ। सुरूआती चरणमा सातै प्रदेशमा विरोध सभा आयोजना गर्न लागेको एमालेले अहिले संकल्प यात्राका क्रममा प्राप्त समस्या सम्बोधनका लागि मात्रै ध्यानाकर्षण गराउन लागेको उनले बताए। ‘आन्दोलनका लागि आन्तरिक तयारी भइरहेको छ, अहिलको ज्ञापनपत्र संकल्प यात्राका क्रममा उठेका विषयसँग मात्रै सम्बन्धित हो,’ उपमहासचिव ज्ञवालीले भने। एमालेले माघ १५ गतेभित्र सचिवालय बैठक र माघ मसान्तभित्र केन्द्रीय कमिटीको बैठक राखेर आन्दोलनको कार्ययोजना बनाउने तयारी गरेको छ।